好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

   佈田花（杜鵑花）開甲滿四界的時，就是春天。毋過，今年的三月敢若毋是我的春天。

三月初去菜市仔的時，可能是磚仔鋪無平，我去踢著，規个人覆落去；過無幾日，跤頭趺的傷猶未好，閣雄雄去閃著腰！

注射，食藥仔，針灸，用藥膏推，所有的步數攏用過，腰傷猶是無啥改善。人講傷筋動骨一百日，姑不而將忍耐，慢慢仔復健。

第一遍去病院復健的時，護理師問我的疼uì 1到10算起來是幾分？

我一時毋知愛按怎回答，每一个人忍受疼的程度無相仝，欲按怎判斷？毋是牛排欲幾分熟遐爾好決定。躊躇一下，想著總是愛講5以上較合理；若5以下敢著來病院？所以我講7分。

是毋是根據疼幾分來參考電療電波的強度和時間長短？

照起工去做六遍，感覺效果和家己做yoga幾个動作差不多。

不過，一遍一點鐘的復健，會當安安靜靜看冊，比佇厝看較專心，算是一兼二顧。

講著跋倒，朋友有的講我平常時跤手算扭掠（俐落），覆落去的時，應當有法度共姿勢撨好，袂傷歹看。講耍笑，目睭𥍉一个之間發生的代誌，人都烏暗眩矣，哪有可能去管啥款pose？有人勸逐家千萬毋通跋倒，萬一跋倒，上好向前跋，用手去撐，手骨斷去比倒摔向（往後摔倒）腦震盪抑是傷著龍骨較好！這閣較好笑，按怎跋敢隨在你選！我是向前跋，雖然手骨無斷去，毋過手後曲（手肘外側）腫起來，連捘面巾都袂接力。

講著筋骨著傷，理由百百種。我一个朋友，因為徛佇椅仔頂欲拍虼蚻，人跋落來，腰脊骨斷去；一个朋友，因為無撙節家己的氣力，彎落去捀一个大花盆，傷著龍骨；一个朋友，佇公園散步，予囡仔的三輪車挵（撞）倒，煞著去做臗關節的手術。

逐家攏是有年歲矣，骨質較冇（phànn，鬆），袂堪得。

毋過，嘛有少年人一个無拄好的動作，就去閃著腰；一个朋友明明真勇健，kan-na雄雄拍咳啾（打噴嚏），就傷到尾胴骨；復健三禮拜，行路才免扞（huānn，扶）壁。伊講：「忽然間提早做老人，足冤枉。」