好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

吳太太招逐家去公園見面；因為疫情，足久無見面矣。

其實「逐家」嘛kan-na（只）伊、阿末、我和一位張媽媽爾爾。阮這个「氣功18式」的小團體本來就無幾个人，經過幾年，老的老，貧惰的貧惰，煞賰四个人。

這日，張媽媽無來，阮三人講以後閣來運動；阮歡喜開講，親像開工典禮。

結果第二日，kan-na我和吳太太出現。

我Line阿末，叫伊來，兩个人運動，真孤單呢。我也真向望伊來，和伊破豆攏會聽著一寡真有意義的台灣俗語，我有幾篇台語文的題材就是uì伊遐來的。

阿末講伊愛睏，peh袂起來，無法度六點半就來啦；會當七點半抑是下晡三點才來運動無？

我是較愛早起時來，因為，會當順紲去共小農買青菜；不過，配合伊，下晡來也無問題。

所以，我問吳太太會當下晡三點來無？伊講慣勢早起時運動；我講若無咱七點半才開始做？伊講彼閣較袂使，「做煞就袂赴看股票矣！」啊？股票毋是九點才開始？伊講八點半就愛開始做功課矣。做啥款功課我毋知，毋過我欽佩伊做啥攏足認真、堅持的精神。自我參加這个小團以來，除了透風落雨，伊攏會出來，準做kan-na伊一个人，也放音樂綴（tuè，跟）咧「起勢調息」「鳳凰展翅」「神仙報路」「雙龍出海」。……

無來公園的時，伊也佇厝內家己做。

無疑悟運動轉去，伊猶有固定的股票功課。聽伊講過，下晡時一份報紙uì頭版新聞，財經，讀到副刋；暗時也一定聽政論節目。莫怪伊講：「規日攏袂無聊。」

做股票有成績，單單一支汽車的股票，聽講就值幾若千萬！

遮爾有錢的人竟然足省；一遍伊予我兩片伊講足有效的酸疼布，教我若已經貼佇身軀，洗浴前剺（lì ，撕）落來，用原本的玻璃紙黏予好，身軀洗好會當閣再貼轉去。「我慣勢按呢做。」

我講：「哇，好額人敢著遮爾儉！」伊講總是袂當拍損。

八十外歲，逐日有確定的目標，「照表操課」，會曉理財，該儉就儉，在我眼中，根本就是一个「生活高手」啊。

《文訊雜誌》2023.6月號