好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

  我講寒天會煎「麻油龍眼卵」，順紲（sūn-suà，順便）共一張相片貼佇群組。有人竟然講我「多才多藝」，予我笑出來；煮食我無啥本事啊。

做家庭主婦超過半世紀，也慣勢家己煮，照講應當真gâu（擅）煮食，連做總舖師都有資格矣。毋過，我攏煮較簡單的菜，無研究精神，無想欲「長進」，也罕得用高貴、奇巧的食材；我煮的菜就永遠彼種水準。好佳哉囡仔袂歹喙斗，攏真捀場。

有的朋友講伊炒的米粉「一度讚」；有的講伊的三杯猴頭菇、香菇滷冬瓜，師父都呵咾；有人講伊煮的雪蓮金瓜湯有番麥、雞卵，足營養，閣會當預防失智。我毋知我有啥料理會當提出來展，感覺我會曉做的也是別人做會到的。

今仔日，竟然因為麻油龍眼卵，予人遮爾（tsiah-nī，這麼）呵咾；以後，毋知會當共伊當做我的手路菜無？

寒天，囡仔轉來的時，我一半擺會煮麻油雞。薑母用麻油炒芳，才炒雞肉，然後酒、水倒入去，用電鍋燖（tīm，燉煮），是無啥困難的料理。若毋驚酒，全部用酒閣較芳。

Kan-na（只）兩老食飯的時，我會煎麻油龍眼乾卵包；浸過麻油和酒的龍眼乾真好食。

有一年，氣象局發布低溫特報，講早暗會出現攝氏10度以下的溫度，吩咐逐家要小心防寒。

我就按呢傳一封電子批予囡仔（彼年line猶未出現），講：「麻油雞酒抑是人參雞會當擋寒，煮一鼎來食。也會使較簡單，薑母麻油煎卵包，摻一寡泡軟的龍眼乾，水煮了後淋米酒滾一下，也真好食。免下鹽。」

囡仔回批有講煮一鼎雞湯啉，有講下暗就來煎麻油龍眼乾卵。細漢後生的批較特別，伊佇丹麥首都哥本哈根出張，伊回：「原來寒是咧講台灣；遮是猶算好，今仔日零下6度，明仔載零下5度。佇遮，叫我煮麻油雞有較困難。」

愛講笑，零下6度叫做「猶算好」！咱攝氏10度就全民啟動抗寒機制矣。

  2022/11/17《人間福報》