好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 13訂閱站台

玉蕙佇面冊頂頭講，時常佇新聞看著有人予人欺負，就有重義氣的朋友呼（khoo）一 陣人去理論，甚至動跤手共對方拍甲叫毋敢。「這攏予我感覺見笑，想講有一工我若予人欺負，敢有好朋友會義氣相伨（挺），替我出面去拍對方？應當是無。我反省，是毋是我做人無夠好？看這个範勢，我所有的委屈應該kan-na（只）會當家己恬恬仔吞落腹。」

讀著這，我笑出來，喙內的茶噴到電腦面頂！想袂到伊遮爾（tsiah-nī，這麼）「多愁善感」，會去想著這種「有空無榫」的代誌！啥物狀況伊會需要朋友去和人相拍？伊佗一位朋友有才調和人動武？攏是攑（gia̍h）筆寫文章和教冊的人啊。

有人共伊回應，動手袂曉，若有需要去辯論、相罵，伊口才袂bái（差）；有人講伊學過泰拳，毋過，進前手骨斷去，拍袂贏；……

我當然是無可能為著伊去和人冤家，我這世人 kan-na細漢的時捌（曾）和姊妹起跤動手，也無拍甲偌激烈。

免講家己用暴力，看人拳頭母來拳頭母去，我就驚甲心肝咇噗跳。

做囡仔的時，媽媽講阮姊妹，「海瑞兵，會食袂相舂（tsing，擊打）。」

媽媽愛看歌仔戲，這句話可能是看戲學來的。海瑞是毋是民間故事內彼位明朝的官？伊清亷，敢講伊的兵肉跤，袂曉相戰？不過，伊可能和「海瑞罷官」無關係，只是用來形容袂做代誌、無路用的少年人。

阮媽媽按呢講，就是罵阮會食貧惰做，毋是希望阮會曉和人相舂；伊愛共阮講的話是：忍氣求財，激氣相刣。

當然，我也袂希望我的囝和人相舂；我攏共in講「理直氣壯」是無毋著，不過，「理直氣和」閣較好。

2022/6/17《人間福報》