好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

   

阿英佇網路看著一篇報導，講消敨*壓力的各種方法，「恁知影經過調查，第一名的是啥無？」

這歹臆，每一个人有適合家己解鬰的步數。

伊講：「是刺膨紗！」

我隨去想著韓劇《Start-Up：我的新創時代》內面的男主角；伊讀大學理工系時參加的社團就是編織社。同學設這个社團的目的，是向望有女同學來參加，借機會交著女朋友。自細漢就是數學天才的男主角無按呢想，伊正經愛刺膨紗，連佇捷運頂頭，也頭犁犁專心織，無管坐伊兩爿邊的人咧討論買車、投資基金。生活無順序的時，心情無好的時，伊刺甲特別拍拚，「不知不覺就織兩尺！」伊頭一遍去看女主角的阿媽，伴手是三塊手織的洗碗巾！

所以有一段，伊和第二男主角相拍，我一个朋友就對編劇足不滿，講無應當予伊用拳頭母出氣，應當安排伊刺膨紗！

在我的經驗，一針一針單純的動作，確實有安搭*著人的心，袂去想東想西，閣是會當看著成果的消遣。

我三十外歲的時也捌刺膨紗刺甲無暝無日，頭殼底想的攏是一針起一針落；坐公車，看著手工膨紗衫花樣奇巧，也倚去好好仔欣賞。

我買的膨紗主要是蓬鬆的毛海，用大枝針織，真緊就會當織一大片。

我織過家己的和囡仔的衫；欲織予阮媽媽的是對襟仔的，有鈕仔，有袋仔，加誠*歹織，閣是較細條的膨紗，結果，竟然猶未完成就放棄。不過，後來我有用「車棉布」做一領棉裘予伊穿。

「蜜月期」過去，留落來的膨紗就囥咧閒。

群組內底逐家講家己排解無聊抑是鬰卒的方法，包括：聽音樂，聽有聲冊，讀小說，看YouTube，看展覽；招朋友食飯、開講；踅街，買衫；運動，旅行。……

消敨壓力的步數百百種，隨在人。

啊我這陣上佮意用啥解鬰、消磨時間？看連續劇啊，毋才會隨去想著有刺膨紗劇情的連續劇。

有幾个愛寫字的鼓吹逐家練大字，講寫字上蓋好，毛筆、墨和紙，方便也俗；隨時會當寫，也免激頭腦，看帖仔一筆一筆練就好；寫的時心情平靜，無煩無惱，袂輸練氣功。「所以，書法家攏較長歲壽。」

這我嘛知，毋過，欲寫字也著看有彼个心情無；人若貧惰，免驚揣無理由。

不過，一遍佇面冊看一位書法家講伊逐日寫字，是為著保持手的穩定性，日後手才袂咇咇掣*。

伊是過謙，不過我有聽入耳。

我共家己講：免要求寫偌好，攑毛筆練字，予手穩穩仔，會當好好仔運用手的功能就好。這陣，有時連掀冊，鈕鈕仔，搝挩鍊仔*，指頭仔攏有較鈍呢。

阿屏講：「著啊，手愛時常訓練，毋通日後攑箸都袂好勢，夾無菜。」

阿慧講：「畫目眉也袂走精，算錢嘛袂重耽*。」

 

消敨（siau-tháu）：抒解

安搭（an-tah）：安頓

誠（ tsiânn ）：非常

咇咇掣（phi̍h-phi̍h-tshuah）：發抖

挩鍊仔（thuah-liān-á）：拉鍊

重耽（tîng-tânn）：出錯

《文訊雜誌》2023/12