好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 11訂閱站台

    

 看著舊鞋盒仔內底五六粒粉鳥仔卵大細的石頭，我隨想著1988年我和大家（婆婆）、大姑、小姑去澳洲、紐西蘭彼逝（tsuā，趟）旅行。石頭是我佇紐西蘭北島Taupo湖抾（khioh，撿）的。

Taupo湖足大，是火山噴發後造成的「火山口湖」。可能按呢，湖漧的石頭是輕輕的「浮石」。有捌（識）貨的講彼會當磨跤底的粗皮，佇台北是美容品，貴參參。我就按呢綴（tuè，跟）人去抾幾粒做紀念。阮大家佇邊仔看，笑阮「戇猴抾石頭」。

阮大家人樸實，袂講啥特別奇巧的話；毋過，伊講的話有特別的趣味。彼遍，伊講我揹的布包敢若乾坤袋。彼是我欲去旅行進前買的帆布袋仔，咖啡色，我本來家己講伊親像和尚化緣的布袋。

乾坤袋聽起來較心適，後來我就正經感覺家己揹的是彌勒佛的乾坤袋；會當貯（té，盛裝）足濟物件，也變會出料想袂到的寶。

袋仔內上「偉大」的物件是後生的「單眼機械相機」和一个長鏡頭。我提出長鏡頭出來用的時，阮大家攏笑我若PRO（ professional的日語）。有影，kan-na（只）剝標準鏡頭、鬥長鏡頭彼个動作，就予邊仔兩位歐巴桑真佩服。

Tsit-má（現在），想起我彼款PRO的架勢，也愛笑。我翕相的資歷淺淺仔，當初讀高中的大囝教我的時，「快門」「光圈」「景深」，予我聽甲頭殼拍結。伊講：「來，uì（從）上基礎的共你講，快門就是天堂的門，光圈就是上帝頭殼頂彼輪圓圓的光。……」

不過，這个老母後來的表現可能予伊淡薄仔滿意，才會連重khok-khok的長鏡頭都叫我紮（tsah，攜帶）出門。伊講澳洲、紐西蘭遐爾（hiah-nī，那麼）開闊，長鏡頭才有法度翕著遠山、草原和規大片的羊仔。彼年，伊是大學生，佇一个經濟雜誌做散工（打工），負責翕相。伊交予我一个任務：加減觀察澳洲、紐西蘭的經濟環境，會當翕幾張仔相轉來予伊用上好。

我確實有觀察著一寡現象，仝團旅行的有幾个有意向去遐投資、移民的團員。其中一个講：「來遮七八工，我的鼻空猶真清氣；空氣遮爾好，移民來袂bái。」

我也翕著真濟張厝後面有私人的船仔、厝頭前tshāi（豎）for sale看板的相片；這敢若會當說明彼陣彼个所在的經濟現象。

彼遍旅行，也有一个予我記牢牢的活動：佇澳洲黃金海岸坐飛天車（雲霄飛車）。

活潑的查某領隊招阮去坐，我的大姑、小姑講無彼个膽，結果kan-na（只）我和伊去。

落來的時，阮大家講我的面青恂恂。

確實有驚著，車道真長，列車起起落落，閣不時360度反來反去（翻轉），無管東方人、西方人，查埔、查某，逐家攏大聲咻咻叫。無出大力喝，敢若心臟會爆炸，甚至跳出來。好咧上車的時，有人教我共目鏡收起來；若無，凡勢飛無去矣。

原來，我毋但是抾石頭的戇猴，也戇膽。

2021.7月號《文訊雜誌》