好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

發財仔車賣果子的查埔人手比紙枋頂的字，講時計果（百香果）俗賣；一袋原本賣百二，這陣賣一百就好。我心內想，價數你家己訂，紙枋你家己寫；是毋是俗賣，啥人知。不過，猶是買一袋。

伊那找錢那講，「我今仔日才有來賣，昨昏去上課。」

上啥課？伊講《易經》。

「哇，《易經》真歹讀呢。你是欲學算命抑是欲看風水？」

伊講毋是，罔聽當做修養。「聽無，嘛無要緊，老師講人有來，靈魂有感受著就真好。」

這款講法有說服著我，人佇氣場好的所在，心情會較安定，一定也會吸收著靈氣。

我也相信念力。

逐早起，我做拜日式，腰脊骨沓沓仔（ta̍uh-ta̍uh-á，緩慢地）彎落去的時，沓沓仔起身伸直的時，我頭殼內會想著我的龍骨一節一節彎落去，一節一節直起來。想甲遐爾（hiah-nī，那麼）明白，親像看著恐龍的腰脊骨呢。若袂記得按呢想，身軀就無運動過後的鬆軟，心情也較差。

所以，我相信賣果子的查埔人也有自上課得著修身的效果。退一步想，伊愛共人講起家己咧上易經，也是因為有光榮感。人有光榮感，生活較有意義，也較會認真做好人；無定著賣物件也較實在，袂隨便唬人。

《自由時報》副刋2020.10.13