樹下野餐
同學之間有一个團體，叫做＜拜四食飯團＞。
因為上課結緣，變做好朋友；後來逐家就會選拜四的課，早時的書法、紅樓夢欣賞，抑是下晡時的素描、水彩、篆刻等。選著其中一个課，就會當佇中晝集合，鬥陣食飯、開講。
透風落雨抑是寒流來的時，去餐廳用餐；好天，就佇「學校」邊仔公園的樹仔跤（樹下）開party。佇遐（hiah，那兒），自由自在，大聲五四三，笑甲東倒西歪都無要緊。
起頭，我kan-na（只）一半擺因為阿圓好禮相招才去參加，可比叫我去食伊做的牛肚瓜仔哖（小黃瓜），抑是苦茶油雞肉燉飯；或者，櫻桃小丸仔欲教逐家做扇面，阿貴今仔日會紮（tsah，攜帶）紙筆，予逐家現場寫大字、互相觀摩等等。（彼遍拄好咧欲過年，有人行過，來問阮有賣春聯無？）
若出去thit-thô（遊玩），我就盡量綴（tuè，跟）。去看花，看日頭落山，看展覽；去學拓字畫，做毛筆等。
這學期，我正式加入這个小團體；毋過，我慣勢食飽才去。
樹仔跤平台頂有一塊大大的柴桌仔，兩張椅條會當坐七八个人；無夠坐，平台邊仔也有石椅。好所在，驚予人坐去，愛有人趁早去占位。
逐家共大大的冊包囥（khǹg，放）佇塗跤的塑膠布頂頭，食的排佇桌頂。中晝頓隨人食，紲落去（suà--lo̍h，接下來）的茶食較精彩；糖仔餅、果子以外，一半遍，有八寶糜、白木耳棗仔湯、yogurt（優格）、梅仔酒；這是骨力的人煮/做來的。而且，事先會佇Line群組講好啥人紮泡茶/咖啡的家私和滾水入滿滿的保溫罐來。
有一回，in叫我紮一塊甌仔（au-á，杯子）來，「較早來咧，今仔日的咖啡特別讚，慢來就無。」
杯子排隊
我到位的時，看著桌頂食的排甲真好勢，敢若欲拜拜。大的細的、矮的懸（高）的杯仔排列等咖啡，看起來也足好笑；予我想著一年去尼泊爾旅行，定定會看著各種塑膠桶佇抽水機邊仔等承水的風景。遐的查某人講的可能是，「水遮爾（tsiah-nī這麼）缺，等遐久才有通承一桶水，愛儉儉仔用咧。」這陣，逐家講的是，「無公平！你斟予伊的咖啡較濟。」「你的甌仔較闊，兩公分就比別人的較濟矣。」有人用雞精的玻璃罐仔，有蓋，好用；後來就決定以後統一用這種杯仔，上公平。「按呢，著寫名閣畫線做記號，才知影幾cc。」
看這七八个同學，有獨身的，有已經做阿媽的，為著啉咖啡驚食虧，竟然笑甲嘻嘻嘩嘩，我講in快樂的能力足強；這是現代人誠難得的優點呢。Sakura用演話劇的口氣講，「阮一禮拜kan-na拜四遮爾快樂，另外六日攏嘛佇厝內偷偷仔哭。」阿圓講，「禮拜四來和逐家鬥陣練痟話，共一禮拜的鬰卒清清掉啊。」
確實是烏白講練痟話。有一遍，有人講阿瑛真好命，in翁毋但會趁錢，也足疼某囝；阿瑛講伊連查某囝的十字繡作業都有法度趕暝工完成。「哪會毋是你替囡仔做？」「提針的工課（工作）我袂曉啊。」
小丸仔講，「恁翁有兄弟無？遮爾好的基因，小介紹咧。」一時喙緊，基因講做基金。
阿瑛講有啊，伊的大伯有兩台進口車，人也緣投，舊年聽大嫂講欲離緣，「若離成，釋出，就共你介紹。」釋出！哈哈。不過，伊講雖然仝爸仝母，「基金」無in翁的遐爾好，大嫂才會想欲離。
小魚也真好命，寫大字的時，in翁替伊磨墨。「這款翁的基金嘛足好。」
這日，基金這个詞就製造真濟笑話。
毋是kan-na會曉練痟話，除了寫字、畫圖、篆刻遮的基本工夫以外，in有各種本事。
有的特別gâu（擅）煮食，豉（sīnn，醃）醬鹹；阿圓做苦茶油雞肉燉飯予阮「試食」第二工，就飛去澳門做兩工六場的煮食教學。小丸仔時常共生活中無路用的物件再製過，變做小藝品。彼遍，伊講逐家厝內加減有政治人物宣傳用的葵扇，教阮共紙面拆落來，用家己的圖/大字來黏扇骨，就變做獨一無二的扇。伊蹛（tuà，住）淡水，tshuā（帶）阮四界耍：看展覽，看花，看古蹟。講起海關碼頭、殼牌倉庫、一滴水老建築的文史，袂輸專業的。阿貴和小昭出身服裝設計，畫圖作品讚，穿插（穿著）也有特色。梅仔人瘦瘦閣幼秀，看起來毋是有氣力的人，竟然有法度佇南美洲幾若國自助旅行40工；雖然有囝做陣，揹大大的行李袋，行路、趕車，排解政治無穩定國家的臨時狀況，嘛毋是普通人有才調應付的。後個月，伊正經家己一个人欲去日本自由行40日矣；可能因為是教地理的老師，對世界「無咧驚」。
小丸子做的扇子
講著氣力，少年團長阿貴第一名。團長是我號的，伊攏提一个大大的、硬殼的「百寶袋」，內面貯（té，盛裝）的包括鋪塗跤用的塑膠布，替同學買的寫字、畫圖用品；每一遍樹仔跤的party食無完的物件，也靠伊提來提去。
無論上啥物課，伊攏是當然的班長；因為有耐性，服務精神足好。
伊做過幾若遍啟智班的代課老師，學生囡仔足愛伊，上課的時陣，相爭欲坐頭前；下課時間，也相爭欲共老師搥肩胛頭。別的老師感覺奇怪，講in哪會變做遮爾活潑？原本無話無句啊。我問阿貴伊到底有啥魔力？伊講，「我真心愛in，囡仔單純，一定有感覺著。」
因為我寫台語文，拄著（tú-tio̍h，遇到）台語的疑問，in會問我。Sakura有興趣學台語，伊的發音小可仔（稍微）臭奶呆，聽著真心適；「我」，伊一遍一遍出大力講，猶是「哇，哇」。小魚愛講「你是本省人，我是外省人」；「省」音伊講無正確，聽起來煞變做「你是笨死人，我是活死人」。
一遍，阿貴講伊會曉自頭到尾讀我的台語文，隨提手機仔出來，念我面冊頂頭彼篇＜無喙的貓仔＞的頭一段：
我的衫櫥內有一對hello kitty尫仔。十外年前我猶咧上班的時，一个同事送的。彼時陣，真濟人咧痟這種無喙（嘴）的布貓仔；排隊排規半工，嘛無一定買會著。
讀了真順喔，嘉義人的腔，好聽。小昭紲落去念第二段：
收著這種禮物，我淡薄仔意外，我毋是會愛這款尫仔的大人啊。伊講，「趣味啊，你無看in遮爾（tsiah-nī這麼）古錐。」
伊是台北人，讀了也袂bái（差）。
紲落換阿圓讀：
這个同事嘛生做古錐古錐，閣好笑神；伊個性堅強，雖然離婚，也無失志，家己一个人共（kā，把）兩个囝栽培甲真好。
阿圓是杭州人，但是佇中部大漢（長大），講台語無問題。伊和我以前閣是同事，對文內的主角真熟，讀起來可能較有感覺。
聽無仝腔口的三个人念我的文章，我歡喜閣感動。想袂到我第一場台語文的朗讀是佇公園的樹仔跤舉辦的。有微微仔風，有桂花的芳味，有幼幼的茄苳花飛來in的衫面頂、頭殼頂，實在是一幅非常美麗的圖啊。
2018.5月號《文訊》雜誌
文章定位：
