好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

和一位畫圖班的同學去印老師的畫稿時，伊看天色，講，「敢若欲落雨。」

我有淡薄仔稀奇，「你台語的發音真準，你會曉講台語？」

伊一向恬靜，和伊的圖仝款秀氣，罕得聽著伊講話，免講聽伊講台語。

「會曉，我bat（曾經）佇小學教過一、二年仔生的台語。」

我驚一趒，毋但會曉講台語，竟然猶教過！伊的外表予人的印象明明是彼種袂曉講台語的外省人，可見「人不可貌相」啊。

伊講教過一寡心適（趣味）的囡仔歌，可惜大部份攏袂記得矣，有一條印象較深，是按呢念：

一个囡仔愛講話，到底是咧講啥物貨？講天講地講懸低，講烏講白講大細，講啥物，講啥物，講啥物貨？愈講愈濟，愈講愈濟，毋知咧講啥物貨？講甲一布袋。

確實趣味，我毋bat聽過。伊講用唱的閣較心適；學生囡仔攏唱甲真歡喜。

問伊哪會台語講甲遮爾（tsiah-ni7這麼）好？伊講這無啥啊，佇下港（南部）大漢的囡仔有真濟機會聽/講台語，「袂曉講才奇怪。」

按呢講有理，囡仔鬥陣耍，學在地語言無困難。我一个外省朋友連台灣俗語都講甲真紲拍（sua3-phah，流利）；有人呵咾，伊就講耍笑，「我是艋舺來的。」意思是正港本土的，其實伊做囡仔的時蹛（tua3，住）佇中部糖廠的宿舍。

大人若有心欲學，抑是職業的需要，也有法度講甲削削叫。一位朋友主要的生理（生意）對象是台語人，一个眷村囡仔去做南部立委的助理，in（他們）講台語的腔口就袂輸下港人。一位朋友學唱台語歌，台語的講聽能力嘛真有進步；較可惜的是，伴唱機寫的攏是用華文讀倚台語音的「火星文」，對伊讀我的台文作品無幫助。

我幾十年來蹛佇台北，交陪的外省朋友主要是公教界、文藝界的，罕得聽著in講台語，才會對彼位「看起來袂曉講台語」的同學講的台語，感覺稀罕啊。

原載2017.7.1《中華日報》副刋