好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

早起，一个太太行路竟然uì（從）咧做體操的阮一陣人中央（tiong-ng，中間）穿過。

我講公園遐濟小路好行，哪會按呢？看咱這个團才七八个人，櫳櫳（lang，稀疏）仔較好過？

陳太太講伊和in翁不時就按呢行啊。「毋過，攏是一前一後鬥陣行，今仔日可能是門扇板鬥無密（ba̍t），才家己行。」

門扇板鬥無密？啥意思？

伊雙手向我，一手較懸（高），一手較低，無對齊，「兩片門扇板鬥（裝）無密，關袂好勢；意思是翁某兩人冤家（吵架）啊。」

這款形容誠趣味。我想著的是古早彼種「有空有榫」的門扇板，毋是現代用蝴蝶鎖的門。這陣的寺廟畫門神的大柴門應當猶是用古早的工法，後遍去廟的時，著來斟酌共看覓。

隔兩日，我閣去運動的時，正經看著翁某兩个人一前一後uì阮中央行過，予我偷偷仔笑起來。可能in和我仝款，毋是逐日去公園，我才毋捌（不曾）看著這款奇怪的行為。

In兩人攏七十歲左右，翁較大漢，某較矮，頭毛攏無染，殕殕（phú-phú，灰白）仔；毋過兩人的體格猶是真挺，行路輕快；無講話，認真行，跤步整齊，親像有人咧喝號令。

一般的人佇公園行路運動，攏沿外面彼箍鋪四角磚仔的路一輾（圈）一輾踅（se̍h，繞行），袂礙著別人，閣較好節（tsat，估算）家己行幾輾，是偌濟步矣。in無仝款，對阮中央抑是邊仔行過了後，in直直行，行到予草埔仔擋著，才換方向，行另外一條磚仔路。In向前、轉彎的動作，敢若是雙人衛兵；有時一前一後行咧行咧，會變做兩人平行，肩胛頭對肩胛頭，我心內就笑，「今仔日，門扇板鬥甲真密矣。」

有時kan-na（只）一个人出現，阮會講「另外彼片門扇板無出來」；尾後簡單講查埔板，查某板，愈講愈好笑。

有一早，查埔板竟然來來去去uì阮中央行過四逝（tsuā，趟），敢若是欲表達遮是伊的地盤，有伊袂使放棄的「氣場」。經過幾遍的觀察，我嘛想著這對翁某行路遮爾規矩、遮爾有原則，可能in的路線誠久以來就按呢，是阮兩個月前為著欲覕（躲）日頭徙來這个所在，才破壞著人的路線。

按呢想，以後看著in遠遠行來，我就趕緊閃開，讓較闊予in行。

2016.12.25《聯合報》副刋