好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

鬥陣做運動的一个太太提一包梅仔黑糖來分予逐家，講彼是伊的厝邊佇某所在買的。「袂真甜，好食：我叫伊後遍若閣去，幫我買幾包。」

我心內愛笑，我和朋友食雞卵糕，時常聽著的呵咾（稱讚）是「袂真甜」；想袂到食糖仔也愛袂甜的；驚甜哪會欲食糖仔？

毋過，我對這句話較關心的毋是糖仔甜抑是無甜，是伊的台語。自寫台語文了後，我對台語較敏感；我講伊這句話是台語和華語摻（tsham，混）咧講。伊淡薄仔意外，「我規（整）句攏講台語啊。」

我講毋著，「幫我」是華語翻譯過來的。伊講伊攏按呢講啊，「啊無欲按怎講？」我講阮是講「共我鬥買」、「替我買」；改良過的「幫忙我買」嘛會使得。伊一下想，講著喔，「講幫我講甲真慣勢，不知不覺矣。」

因為我一時家婆，幾个查某人就按呢徛咧會（談論）in兜（tau，家）台語的生態。一个講伊的囝三十外歲矣，台語會曉聽，袂曉講，「我共伊講台語，伊攏用國語回答；爸母是台灣人，竟然袂曉講爸母的話。無法度，佇台北大漢的囡仔。」一个才五十出頭的太太講伊嘛是會曉聽袂曉講，阮講伊是外省家庭，會曉聽就算袂bai2矣。伊講伊的爸爸是外省人，伊嫁的翁也是；毋過伊的媽媽是嘉義人，「講起來，台語才是我的母語。」我講，「按呢你著應當趁早佮你媽媽學台語啊。」我講「趁早」，因為有一日，媽媽會無去啊。

一个講in孫共伊討餅，伊講我無買餅；孫仔講你拄仔（剛才）有講「餅乾」。阿媽翻頭想， suah笑出來，其實伊是叫孫仔毋通挖「鼻空（孔）」，枵鬼（嘴饞）囡仔共台語的「鼻空」聽做餅乾矣。

你一句我一句，講甲趣味趣味，彼个講「幫我」的太太敢若咧做結論，講，「佮囡仔講話猶是盡量講母語較好，加會曉一種語言有好無bai2。」紲落閣共我說多謝，講以後伊會盡量講較純的台語。

我笑起來，「毋是欲參加台語演講，華語台語lam7（混）咧講真正常；有的人嘛是華語英語摻咧say 啊。」 2016.11.25《中華日報》副刋