好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

    

阿晴約八九个朋友去in新厝開講、食晚頓，有的人tsah（攜帶）家己料理抑是買便的菜做伴手；其中上有氣勢的是言言的肴豬跤（腳），一大肢跤囥（khǹg，放）佇桌頂現切。

因為uì電鍋提出來無偌久，閣燒燒；伊一手用箸硩（teh，壓）著，一手慢慢仔批（phue，削片）。每一片有皮有肉，肉粉紅色、皮厚閣半透明，看起來就真好食的款。

佇餐廳食這款菜，是切細塊細塊的冷盤，毋捌看著燒的，閣現切；逐家目睭金金看，呵咾伊的刀工真專業，袂輸飯店大sai（師傅）批燒鴨的架勢。

「庖丁解豬」同時，一片一片分予逐家食，豬跤的肉幼、皮khiū（有彈性），佮（kah，配）浸醋的薑絲，逐家食甲喙笑面笑。進前已經食過炒米粉、蝦仔和其他的菜，甚至也有一盤醬燒豬跤；tsit-má（現在），竟然無人講食袂落去；那食那呵咾，呵咾甲觸舌（tak-tsi̍h，彈舌），順紲就請教這个菜的做法。

伊講豬跤是共（跟）東門市場一个豬砧訂的，伊的豬是家己飼的，肉質好皮閣厚；買轉來了後用粗鹽、酒共規肢豬跤一遍一遍massage過，豉（sīnn，醃）起來。兩禮拜後才uì冰箱提出來炊，「事先愛用索仔共伊拗彎縛好，才有法度囥佇大同電鍋內底炊。我分四遍炊，每遍兩杯水。」

伊強調，「我是用前跤，較有肉，閣好食。德國豬跤也是用前跤。」

聽起來是愛有氣力閣厚工的菜，我無啥可能去做；我較想欲知影的是，前跤後跤按怎分別？

除了家己的人做生日，我罕得買豬跤。每一遍賣豬肉的問我欲愛前跤抑是後跤，我攏誠困擾，kan-na（只）會曉用比的。我毋但（m̄-nā，不但）食過豬肉，也看過豬走（跑），毋過欲叫我分辨豬砧頂的前跤後跤，就無法度。我的基本常識是，較大肢的較有肉，較貴；較小肢的食皮，較便宜；但是膠質濟。

我講較大肢的應當就是後跤，遐敢毋是連後腿？言言講錯矣，後腿彼部分叫做腿庫，取落來賰的就是短短的跤；前跤保留著一節腿肉，所以較大。

我一面聽一面想一隻豬徛（khiā，站）佇塗跤的模樣，頭殼打結，煞愈花（糊塗）。在座攏是超過六十歲的文藝界朋友，也有人和我仝款，前、後跤分袂清；你一句我一句，講甲真鬧熱，一个笑笑仔講，「哈哈，今仔日煞變做關係豬跤的討論會啦。」

椰子算是在座一个gâu（擅長）煮食的，伊涼涼做一个結論，「這簡單，就像咱有大腿和小腿；小腿就是前跤，大腿就是後跤啦。」

啊？我一時gāng（愣）去，想袂到竟然有人比我閣較天兵！

我輸伊。

2016.11.25《聯合報》副刋