大 C 佢話買晒飛之後，佢個 FD 至話俾佢聽唔去。突然間唔知搵邊個就問我去唔去玩，我見好耐都冇去過於是應承去囉﹗佢話帶埋佢細佬同堂細佬去，我都想帶埋我學緊日文既堂細佬去呀﹗可惜得一張飛啦﹗
其實我由細到大都驚鬼鬼，唔知點解今次會應承去架，不過今年可能自己一個去咗兩個禮拜旅行，晚晚電視台就播鬼片廣告，可能咁樣已經嚇到而家見到都唔係好驚啩。於是好似胆生毛咁入去玩喇﹗
因為大 C 買既飛係貴飛，即係包五個主題館既 Pass，所以我哋唔駛好似普通人咁排長龍至入到去玩。我哋 7 點半至去到，9 點半已經玩晒 5 個喇﹗勁快﹗大家如果下年去既都唔好貪平，一定要買快證，如果唔係真係由朝排到晚。
唔知做咩事，一入到去（大 C 捉實我隻手），見到有嘢彈出嚟時，大 C 就尖叫啦﹗而我就……大爆笑﹗仲係要好似千嬅嗰隻喪笑，停唔到。一彈出嚟我就笑，所以 D“鬼”都真係驚咗我，唔敢嚇我喇﹗嘻嘻﹗就算係我未入去都驚定先既中式鬼屋，我都係笑到肚痛﹗總之就無驚無險啦﹗
坐登山纜車至笑死我﹗上車後佢哋三個見對面車有人就大嗌﹗『喂~~﹗』『唔准打茄輪﹗』間唔中會聽到有回應，我哋就會同佢哋講玩得開心 D。後期大 C 個堂細佬就改口問『阿梅﹗阿梅你食咗飯未﹖』『蘭姨﹗(羅蘭姨﹖﹖)你吔咗飯未﹖』間唔中會見到架車有綠光，類似貞子既物體會企喺度唔郁，我反而唔驚，覺得安排得幾足﹗
玩完 5 個主題館之後，到玩機動遊戲喇﹗海盜船我比較驚 D，好彩大排長龍，唔駛玩，改玩隔離，我唔記得個名，淨係有支柱，然後好似有 D 八爪魚咁轉。因為冇人排隊，所以玩呢個。因為我自從幾歲嚟過之後一直冇去過，當時太細所以亦都冇玩機動遊戲。呢個既離心力都好大，好驚佢成架車飛咗出去，不過喺上面停咗望番個夜景真係好靚。之後就竟然去玩我咁大個女第一次玩既『過山車』，重要係木造嗰隻。嗰三次落斜真係好驚，尤其係第二次最高落到最低，我成個 Pat Pat 係離晒個位，嚇到我個心真係飛咗出去。我覺得成晚最嚇死我既就係呢個。而家打緊都有少少驚﹗總算挑戰成功啦﹗
近排有好多嘢發生喇﹗所以都冇時間寫日記，今日收到准考證添喇﹗一定要考到合格呀﹗
文章定位：
