今日同小藍同埋出前一丁一齊去玩塔羅牌兼食 Dinner，本來真係抱住聽下無妨既心態去聽下佢講咩野（真係架﹗）點知~~呀~~~~~~~~﹗﹗﹗
0個間係上樓既店舖，近總統戲院附近。上到去好似去左屋企咁，有張好大張梳化，仲有幾張小茶几，我諗大概間野可以坐到 20 人左右啦﹗1 個餐雖然 $128，但原來有沙律、主菜、甜品、飲品，再包埋玩塔羅牌（同一條題目問三個問題）都幾 OK 啦﹗我地點完野食就傾下計，再到食完主菜0個個 Part Time 玩塔羅牌既女仔就同我地玩喇﹗我係最後一個問，之前問出前一丁大部份都準，小藍就有 DD 啦，但都 OK 準喎，但佢地兩個都係問事業，所以占出黎既結果都係估估下，好喇，到我喇。
點解會準成咁架，真係好驚呀﹗小藍猛0係度笑唔停，我就越聽越驚，點解真係俾佢講中左咁既﹖﹖0個個女仔（Sorry! 唔記得問佢叫咩名）佢睇一睇我洗完後既第一隻牌，就開始講我而家既狀況：（以下講既係大概啦，小藍如果妳記得既幫我補充下啦）妳一直身邊都有男仔，有 D 仲對妳有好感。但係妳冇一個睇得上眼，而妳亦都唔會俾佢地知道妳心裡面諗緊 D 咩野，所以好多時 D 男仔會掉頭走。而近排妳就對一個男仔有 D Feel（聽到呢度小藍直情訓左0係度笑）。但係妳同佢都唔俾大家知道對方諗緊咩野，可能好熟啦，所以妳而家就唔知點樣做咁。
各位係咪好驚呢﹖我好驚係因為佢連我最近對個男仔有 Feel 都知道。嘩﹗唔係卦﹗跟住我就問左三個問題，明天再續啦如果記得既話﹗（因為好眼訓喇，而家，嘻嘻﹗﹗）
文章定位：
