我終於有老鼠仔喇~~不過對手臂仍然各有 10 吋﹗
我恨左好耐架喇，不過真係好激氣，因為上個禮拜四有好多貨到 Office，但係冇人主動幫手，大定都知我唔鍾意求人做野，於是我咪自己一個死死氣搬囉。最嬲既就係我講緊電話時，聽到門鐘聲知道有人送貨，照計就唔駛我去，會有其他人去收既，0個次應該係 Annie（佢係自己有男朋友仲成日痴埋 CP 仔度）開門既。大約過左半分鐘後我剛剛收線，就聽到佢好倔咁講：『 Cindy 呀，收貨呀﹗』我直情呆左，因為：1)既然佢應門，就應該係佢收貨，呢樣 Ann 姐一開始叫佢做野時就已經講明。2)咩野態度呀﹗我話晒都叫做高級過佢，而且年紀又大過佢（19歲咋人地）佢咩野新鮮蘿蔔皮呀，指我做野﹖
0個陣簡直眼火爆，於是 Pum Pum 聲衝出去收貨，當 D 貨係佢咁，係咁掟，講真 D 貨好鬼重（有 Keyboard，有書，當然有 Software 啦），但係 D 火憾憾聲，D 貨越重，我就掟得越大力，咪當我流呀﹗
到差唔多 6:30，就聽到 Annie 同師奶仔講（冇計啦，我地公司好細咋）：『呀~好勊呀﹗』簡直頂佢個肺。成間公司如果有人勊得過我既我即刻唔撈﹗﹗真係勊佢個死人頭﹗佢講完呢句說話我即刻擰轉頭望住佢，個樣仲帶有少少疑惑添。佢可能 Feel 到有少少唔對路就冇再出聲話勊喇。如果佢再講多句我就即刻剷佢上天花板添呀。
睇到呢度大家一定會諗：妳梗係嬲佢啦，妳話佢有男朋友仲痴埋 CP 仔度嘛。Sorry, 我真係對事唔係對人架。佢唔係咁對我我都唔會咁對佢呀﹗最後佢走時仲好嬌咁同我講：『 Cindy，我走喇，Bye Bye﹗』我都費事望佢，就咁對住個電腦講 Bye Bye。跟住我做完 D PO 俾老細簽名時佢都眼定定望住我，驚我會對佢不利咁。可能我個激氣樣真係現晒出黎啦，但係人地控制唔到嘛~~
星期五我 D 火都唔係好控制得到。Annie 同我講咩野，我都唔係好啋佢。0個日我仲竟然 6:10 即刻走，一黎我要拎隻 Software 俾肥妹，二黎真係唔想對住個 Office，費事激親自己。到星期六我就動手執番好個倉，之前返既貨其實全部擺出倉門口，走廊，如果唔執而有客上黎就真係好核突。咁當然，又係得我一個執啦，又係會執到 Pum Pum 聲咁啦，於是老細可能忍唔住，叫 Ann 姐入去開會。
執左四個鐘，到 12:15 左右，終於執好晒，倉門口同走廊都回復舊貌，自己都覺得好似葛文輝話齋：任務完成，鄭裕玲﹗冇幾耐，Ann 姐都『放監』出黎。之後同我講：下次如果要搬貨既話要出聲，可以搵 Henry（IT 同事)幫手架。我聽完都唔知可以俾 D 咩野反應佢，於是乎我自己就擰轉面，費事啋佢，簡直係廢話。當其時所有人係坐0係度一 D 反應都冇（包括 Ann 姐），而且我係鍾意 D 人係有自發性既，無謂勉強嘛。我覺得老細咁樣叫 Ann 姐同我講呢句野係因為驚我做得嬲得濟自己闢炮唔撈，自問以佢俾既人工我諗佢請一世都請唔到好似我咁抵得諗既員工（又唔計辛苦怕污糟，又唔怕敖夜開 OT 冇 $$ 收都制）。
唔知自己有冇講過，其實自己點解仲要0係呢間公司繼續做呢﹖
1)學到野，老細會將佢所識既野，同埋依據員工既吸收能力黎教員工做野，佢唔會一次過要員工學識晒，反而想員工0係錯誤中學習。所以有幾次自己做錯野，訂錯貨，老細冇鬧我之餘仲教我點樣補鑊時，我都會忍唔住喊，可能好似對佢唔住咁啦﹗但係老細會好奇怪咁望住我：都冇鬧妳無端端喊既﹖﹖
2)同事好好，冇咩權利鬥爭，同肥妹、TT、阿婆玩到好癲都得，成日你請我食野，我又請番你食野咁。
3)CP 仔…
而家留0係度做野既原因淨番一個咋。因為肥妹、TT、阿婆都係落舖頭做野既，有咩事（好似今次件事）都冇人幫手，而且 CP 仔既毋寧兩可態度令我唔想浪費時間0係佢身上。所以我打算：
唔撈﹗
不過都會去完旅行至唔做，如果唔係我驚去唔到旅行又冇 $$ 過年，咁咪仲慘過而家﹖所以小郡主唔駛驚，我會同妳去日本既。
唔覺唔覺，寫左咁長既日記，唔寫住啦，搞到好 Down 添，我食飯喇，希望星期一好番 D 啦﹗呀係喎，我聽日約左小藍同埋出前一丁去銅鑼灣一間好似係餐廳度玩塔羅牌兼食 Dinner 添，我而家咁樣，究竟我問愛情定事業好呀﹖﹖
文章定位：
