遺民世界 The Remnant's 你們若仍住在這地，我就建立你們必不拆毀，栽植你們並不拔出。因我為降與你們的災禍後悔了。

1,331愛的鼓勵 1訂閱站台

＜Seediq Bale＞ 確是 phāiⁿ了 siuⁿ-tsē bô必要 ê 反彈。

Tsi̍t-kuá lâng iá-bē 看進前 tō 已經對伊做出評斷。

當然，另一方面，kâng一个時tsūn mā bē-tsió lâng iá-bē 看過進前，已經 tiàm in ê 心內為 tsit片電影留了一个位。

Ū文字 kap bô文字 ê 一萬年台灣史中間，guá 敢肯定 kóng，Mona Rudo 絕對是排頭一名 ê 英雄，而且未來恐驚 bô͘-lâng ū-huat-tō͘ 奪走伊 ê 名聲。

Guá m̄-sī 因為魏德聖 tsiah 去看 ＜Seediq Bale＞，是為tio̍h Mona Rudo。

魏德聖 hiah-nī-á 堅持，suah hō͘ Mona Rudo ê 一生 kha-jiah 帶引出另外 tsi̍t-tsām 英雄氣概 ê 事件， tse nn̄g ê lâng 互相相照，Mona Rudo ê 光變成是魏德聖 ê 光，Mona Rudo ê 蔭變成魏德聖 ê 蔭。

Tio̍h-sǹg ū hiah tsē hőng 嫌 ê 欠缺，tsit 片電影精神 ê 粗荒性格，tú-tú 更加展現魏德聖 kap Mona Rudo 氣質相近，為tio̍h 目標只ū 戰鬥。

看tio̍h 面前 tiām-tiām leh 思想 ê Mona，pok-hun ê Mona，孤獨 ê Mona，走 tī 所ū lâng 頭前 ê Mona，心中疑遲驚惶 m̄-koh kâng-khuán 拚tāi-sing ê Mona，無疑 tse tō 是 lán 共同 ê 永遠 ê Mona。