根據研究, 台灣上早 ū-lâng tuà-leh, tàng 一萬guā 年前。 M̄-koh, bô͘-lâng tsai-iáⁿ tsia-ê tuà 台東 ê 長濱人 kiau tsit-má ê 台灣人 ū siáⁿ tī-tāi.
現此時台灣 ê 南島民族一般相信大概 tī 三千年前 ta̍p-ta̍p-tih-tih 來 kàu tsit-ê 小島。
經過 tsiâⁿ-tn̂g bô-文字 ê 年冬，一直 kàu 四五百年前, 外來 ê 勢力 tsiah 開始 tî tsia sio-tak, 台灣 suah tō peh-就世界歷史 ê 舞台.
Tiàm bô-文字 ê 時代, 台灣 ê 南島民族過—tio̍h sio-thâi-sio-sat ê 日子, 互相 bô 認做同胞. 雖然 án-ne sio-thâi-sio-sat, suah mā bô tsi̍t-ê 部族壓過別族, suah, mā台灣 tō m̄-bat 建國.
Ū-lâng kóng 中部 ê 大肚地方 bat 出現台灣 ê thâu-tsi̍t-ê 政權, 因為 lán m̄-tsai-iáⁿ in ê 政治組織 kàu siaⁿ 程度, kan-ta ē-īng 暫時存疑, tō sǹg 大肚王國是台灣 thâu-tsi̍t-ê 國家, m̄-koh i m̄-bat 統一全島, suah 台灣 mā m̄-bat 是 一个獨立 ê 國家.
Án-ne sio-thâi-sio-sat ê 日子, 並 bô 因為荷蘭人, 西班牙人, 延平鄭家, 滿洲人相續統治來停止, m̄-nā 山地部落 ê 原住民 koh leh sio-kuà-thâu, 山地部落 mā kap 平埔相殺, 平埔 kap Holo 客人相殺, Holo kap 客人相殺, Holo 內面 ê 漳州人 kap 泉州人相殺, 泉州人內面 ê 本邑人 kiau 三邑人 mā 相殺, 甚至結做怨仇. 台灣話 teh kóng: 「蔡拚蔡, 神主牌-á kòng-kòng-phuà.」
一直 kàu 日本人來前進, 台灣人 m̄-bat 共同相認做台灣人.
甚至, tiàm 日本人統治 ê 大部份時間, 當時號做本島人 ê 台灣人 mā bô 台灣人是 tsit-khuán 獨立身份 ê 意識. Tsi̍t-kuá lâng 受漢學教育 ê 影響, 認中國為祖國, ū-kuá koh 走去中國參加中國對內對外 ê 戰爭, tsi̍t-kuá lâng 選擇徹底皇民化, koh ū tsi̍t-kuá lâng 雖然 ū 某一 khuán 中國意識, m̄-koh 認為台灣 ê tāi-tsì 上優先, in 成為台灣民族主義運動上中心 ê 份子, a tàng in 心目中, 「台灣人」是漢人項下 ê 一个特殊 ê 族群, 而且 bô-認為原住民是「台灣人」 ê 一部份. A 原住民, kàu tsit-sî, 大多數猶 the 舊部落意識變渡 kàu 現代國家(日本)意識 tiong-ng 躊躇.
茫茫渺渺 ê 時陣, 一个 lâng hiông-hiông 出現—ah.
伊自 sè-hàn tō 受漢學教育, ū 漢人意識，m̄-koh āu-lâi 伊 koh 接受日本新式學校 ê 教育, tse hō͘ 伊 ē-īng 透過日語去理解世界 ê 知識, kiau 日本人往來 ê 過程中, 伊清楚 tsai-iáⁿ 本島人 hām 內地人（日本人）tiong-ng ê 界線, 種種差別待遇 hām 歧視 hō͘ 伊產生 bē-sóng-khuài ê 感覺, tō án-ne 伊為 beh tsáu-tshuē ka-tī ê 認同, 去了中國, tō 像 hit-時 tsē-tsē ê 台灣學生所做 ê 決定 kâng-khuán.
伊 tuà tī上海等等所在, 逼 ka-tī o̍h 本底 bē-hiáu ê「國語」.
Tiàm 中國 ê 時日，真正 ê 中國人 hō͘ 伊失望，m̄-nā文明程度 kiau 日本人差 tsiâⁿ-tsē, 上大 ê 問題是伊 tiāⁿ-tiāⁿ 受-tio̍h 排斥（pâi-thik）, hông 懷疑是日本人派來 ê 間諜.
Khiā tiàm 中國人 kiau 日本人二層 ê bô-信任中間, 伊上尾得出一个破世紀 ê 新想法:「台灣人 tō 是台灣人.」台灣人 m̄-是中國人, mā m̄-是日本人.
Bô͘-tiāⁿ, 伊 kâng-代 ū-lâng 比伊 khah-早產生 tsit-khuán 想法, m̄-koh, 伊是thâu-tsi̍t-ê kā tsit-khuán 想法明白寫出來 ê lâng, 而且伊 mā 是 thâu-tsi̍t-ê kā所有本島人, 包括 Holo, 客人以及全部原住民 lóng 看做台灣人 ê thâu-tsi̍t lâng.
歷史上, 出現了 thâu-tsi̍t-ê 正港 ê 台灣人, 而且因為伊 tú-hó 是一个客人, uì 一開始 tō 破除了台灣民族主義 kan-na 是鶴佬沙文主義 ê 惡毒指控.
伊 tō 是寫出「亞細亞 ê 孤兒」ê 吳濁流.
「亞細亞 ê 孤兒」成冊 tī 戰時 ê 1945, 離二二八, koh ū 兩年, 伊確實是時代 ê 先知.
Tuì hit-時, 台灣派 tsiah thâu-tsi̍t-kái 出現 tī 世界.
Tsit-本冊 ê 出版是台灣歷史 ê 原點. 前進, 台灣 ê 歷史 kan-ta 是一堆 suáⁿ-suáⁿ, ū-時互相 bô 牽聯 ê tāi-tsì, tuì hit-時, 台灣歷史開始發展成兩个勢力 ê 鬥爭, 一个是堅持台灣人 tō 是台灣人, 台灣是台灣人 ê 台灣, án-ne 一種意識 ê 力量, 一个是 áu-ah 台灣 ê 獨立性命, 一定 ài 台灣附 tī或者中國或者日本或者美國, 主要 tī 中國 ē-kha, 當台灣只是一个地方 ê 思想.
台灣史 ē-īng 做一个國別史獨立存在, he 是 uì tsi̍t-个重大 ê 歷史事件 tsiah 成立—ê. Kàu taⁿ, tsit-層意義 iáu-bēhō͘ 多數台灣人所理解, tse 表示 lán ài kiâⁿ ê 路 koh tsin-hng, 甚至 m̄-tsai-iáⁿ lán 有生之年 kám 看 ē-tio̍h i 所爆發出來 ê kiaⁿ-lâng 力量 kám ē-īng 得—tio̍h 最後 ê 勝利. Bô-論 án-tsuáⁿ,吳濁流老先生做一个gia̍h-筆 ê Zeitgeist, tit-beh 等於台灣人 ê Fichte, tsit-ê 歷史業績已然確立.
文章定位：
