會記得存年的一個下晡時，我對台中榮總做復健轉來。佇車頂，我及司機阿伯咧開講，阮毋知講著啥，伊給我應講：姻緣天注定，伊若是你的，伊擱按怎走嘛走袂去；伊若毋是你的，你按怎迮嘛迮袂著。毋過，我心內咧想，跋落佇愛情河的人擱按怎peh嘛peh袂起來。就親像我。
二○○四年的秋天，我去熟似著一個查某囡仔，伊是咧給我做復健治療的老師。彼時我及伊真有話講，過無幾個月，伊就互我感覺伊是我這世人欲找的人。後來我就開始用心來給伊追求，兩冬外來，我佇這條路行kah坎坎坷坷，嘛捌意志消沉過，給吳晟老師對我文學作品未來的發展的教示及叮嚀攏放袂記得；甚至一段時間攏浸佇朋友的廣告公司唼燒酒。後來，我想講若擱按呢落去，我這世人會永遠失去一個佇我生命中真重要的朋友，就算講心內擱按怎毋甘願，嘛著愛放棄ah！
彼時，我就將家己的決定，拍做一封批，參一寡無勇氣當面提互伊的物件，寄互伊。毋過，我知影我騙袂過家己的心內飽滇的愛。
批寄出去了後，我開始經營一組寫互伊的台語詩，寫這組詩的目的，是想欲紀念家己的生命過程中愛一個查某囡仔愛kah這呢深的故事。毋過，起先咧寫的時真無順序，定定拍無幾字，目屎就輾落來。另外一方面，我嘛驚我食kah老老老的時，會袂記得這段美麗的記持。
佇半年前，我及伊對見面袂輸生份人同款，沓沓仔擱成做朋友啊。彼時，阮阿爸煞雄雄發生代誌，我的心內真驚惶，毋知影欲按怎去面對，我就將厝內發生的代誌講互伊聽。彼時，伊已經受洗為基督教徒，我猶咧慕道，伊給我安搭；教我按怎替阮阿爸祈禱，擱講伊家己嘛會為我來祈禱。日常生活中，我因為帶著「陣發性關節炎」，雖然已經幾若年毋捌發作，毋過，醫生交代我愛定期抽血檢查追蹤。我出世進前就佇母胎難產，致使帶著「腦性痲痺」的症頭，這種症頭卡輕的會凍行路，干單講話袂清楚抑是一枝手koeh-koeh；ah若我是腳手攏無方便，講話擱講袂明，便若拄著愛抽血抑是注射的時，手骨攏會緊張
會chhoah無法度及護士配合。醫生交代我愛去抽血彼工，阮媽媽猶佇台大病院咧陪伴阮爸爸，拄好伊佇病院食頭路，我就叫伊陪我去，伊無推辭。此後，我便若愛去抽血攏是伊給我鬥相仝。
咱人定定咧講一句話：緣份若欲來，按怎擋嘛檔袂稠！自從阮兩個見面袂輸生份人了後，伊已經半年外毋捌及阮媽媽連絡。佇今年的元旦，伊拍簡訊給阮媽媽問好，阮媽媽看著伊的簡訊歡喜kah隨隨敲電話互伊參伊開講，到尾ah擱講著我及伊的代誌。可能是阮媽媽的鬥牽成；亦無的確是天父賞賜的祝福。隔轉工早起，伊咧給我做復健治療的時，互我一個會使算講是約束，伊細聲-ā給我講伊無想欲親像以早按呢對待我，目前干單想欲親像好朋友按呢及我做伙來關心阮爸爸媽媽，ah若咱兩個的未來交互天父來安排！聽著伊這個話，我袂顧咧邊仔有患者及家屬，我歡喜kah笑出一粒春天的大日頭，落尾伊擱講著阮媽媽對阮二個的婚事真著急，互伊真shock！聽著按呢，我給早就飛對外口去的彼粒心giú倒轉來，勻勻仔給伊講我知影咱兩個未來這條路抑真長……。
二○○七年二月初九是伊的西曆生日，嘛拄好是我舊曆的生日，這個機率無的確有一個真特別的意義，所以我挑工揀這工，佇牧師及一寡兄弟姊妹的見證之下接受洗禮。坦白講，冬外前我會入去教會是因為身軀邊真濟同齊佇文學路上拍拼的朋友攏已經咧慕道，ah我家己嘛無排斥這個宗教，嘛想欲開闊家己的文學視野；另外一方面，chhōa我入來教會的朋友是伊的同事，我想欲透過伊來了解伊彼站仔過了好無？因為彼段時間伊無欲chhap我。毋過，過無外久我心內就真實承認主耶穌是我生命中的救主，因為我慢慢仔得著真濟祝福！嘛對聖經內底沓沓仔讀著一寡關係生命的啟示。
過年後，我敲電話參好朋友張姊開講，我給張姊講我及伊沓沓仔開始咧震
動ah，張姊替我真歡喜！擱o-ló伊生做真súi！因為頂回怹翁婿頷仔頸受
傷tòa院做復健治療的時，我捌偷偷仔給張姊報過伊。尾-ā，我給張姊講這條路並無好行，就算伊真實願意來接受我，未來猶擱有怹序大人彼關真歹過！誰知影張姊應我：「假使伊若是查某囡仔的老母，伊願意將伊嫁互我，因為伊知影我對伊的感情；伊知影阮厝內的環境按怎；伊知影我的序大人做人按怎！」聽著張姊這個話，我笑笑仔給張姊講：彼是妳的想法無正常！其實我感覺家己的鼻仔淡薄仔酸……。
Chit無外久，伊總算高考通過。佇電話中，我給伊報告chit個好消息，起先伊猶毋相信！叫我愛唸準考證的號碼互伊聽，我一下唸煞，電話彼爿的伊歡喜kah親像佇日頭腳的粟鳥仔。我就講耍笑叫伊就愛請我食飯，伊真大方來答應，嘛真感心這兩年外來我對伊逐回考試的鼓勵及關心。彼晚佇咖啡館內底，冷氣真冷！我看伊假那咧寒的款，我伸手去ù伊的手盤，冷冷冰冰，彼種溫度互我足想欲永遠給伊的手lak稠咧！毋過，我問我家己我有啥mih物件通互伊？我的雙腳無法度行路又擱頇慢趁錢，會凍互伊的干單偆一粒有愛的心，猶擱有一種毋向家己的生命認輸的的樂觀的精神。
三個外月來，我看著春天的腳印愈來愈明，我煞淡薄仔會毋甘春天的腳印愈來愈深……。ah毋過我相信這段坎坷擱烏暗的路，每一個彎斡抑是山崁攏有天父的看顧及照炤。假使阮兩個是天父所祝福的。
2007年4月13日．初稿
2007年4月22日．完稿
刊載於第66期《海翁台語文學月刊》
文章定位：
