唔經唔覺，個新聞台原來已經寫到成一百篇架喇。
我好清楚記得，我開呢個blog既原因。
首先，呢度係我比我爹了解我既渠道，因為大家都唔係咁識用說話表達自己既人，由細到大都好少溝通。之前中學教我中文既亞sir係我恩師，佢第一個比我作文比我咁高分，同埋話比我知原來我係得既人。
係佢鼓勵我同我爹多溝通既。
佢有一份功課係寫日記，每日都要寫（佢每日都睇每日都覆，真係做死佢咁濟！）。
由日記入面佢知道我地屋企既關係都幾疏離下，於是我爹去見家長果陣，佢拎住本日記同我爹講，話我爹娘比左一個好好既環境我，等我發展我既思考能力（都叫有少少啦）。
而呢個亞sir，就係再送我一程，送我去我而家行緊既呢條路既人。
佢就係我做創作既開山恩師。(唔知d人仲以為邊個大師講既佢既創作歷程添，哈哈哈哈)
同埋開始左修補父女關係既進程。
呢個blog，幫左我渡過我咁大個女以黎第一個人生既黑暗時期。
所以岩岩開台，成台怨氣都好重，而家睇返個list頭果辣，猶有餘悸。
開台日子，仲係佢既生日，好唔開心，好想搵人比我同佢講，不停咁講我唔開心，因咩唔開心，有幾唔開心，甚覺得講一次都唔夠，要講好多好多次我唔開心，先至足以放哂我d唔開心出黎。
但係我同時都明白，咁樣係一件好自私既事，對方只有受苦既份兒，聽一次已經夠，仲要比我捉住講咁多次，佢肯我都唔好意思。
於是我需要一個渠道發洩，就生左呢個留低你既愛出黎。
同時都記載住我心態轉變、成長既過程。
由開頭係完全天昏地暗時間，任何野都提唔起興趣，只係知道自己唔開心，世界所有其他事，關我屁事，只係擔心無人會再要自己，就好似吊住條命想死又唔敢咁。
後來開始好返少少，但係好明顯係睇得出個人係無火，我諗可以話係對自己無哂信心。
人一無信心，就想搵辦法去討好人。於是開始多左懶好笑既文章出現，雖然都係我由衷想講既野，但係修飾得好緊要。
之後，停產左好耐，因為低潮期過左，情緒波動無咁大之餘，對世界仍然係無乜感覺，無火喇，所以可以見到d日期係隔左好耐先有一篇。
再到後來去香港實習，遇到既沖衝實在太大喇！
去到一個陌生既地方，遇到好多陌生人。無諗到我竟然會比呢班人拯救到。
係陌生既地方，基本上掛住處理心入面既不安已經花盡心力，都無乜時間再諗返起令我唔開心既事。
再遇埋班大火人，比佢地d火燒埋我果疊喎竟然！最令我感動既係佢地真係有心幫我。
對於呢班人，雖然同佢地唔係真係好到要攬頭攬頸，但係真係我既救命恩人，總之真係好感激！我估唔到會有d廿幾歲既人，係我心目中既地位可以升到咁高！講真，呢世女我喜歡既無血緣關係既人好少(可稱之為朋友)，但係都叫做左返咁上下數目，但係超越喜歡既就真係無幾多個。咪就係我亞sir果個級數囉。
對住佢地我唔識又或者唔好意思表達我既感激，肉麻野，好少做. . . . . .望就望佢地有一日會見到呢度，知道我有呢份心意就得喇。(啋. . . 講到好似玩暗戀咁. . . . . . )
喂，好侵呀，講左好多次呢個話題喇！
咁真係丫嗎. . . . . . .而家玩review呀！梗係講下架啦！一講又忍唔住要再講. . . . . .
丫，講返係香港果期寫既野先，就係新鮮事既記載，同埋開始對個世界有返d感覺喇。
再比果班人燒多兩燒，好似開始返返黎喇！
係香港最後果次大present，佢地令我開始記得，我要點樣相信自己，點樣感受呢個世界。
到左而家，臨畢業，趕緊論文，我想表達自己既慾望比未返黎更高漲。
可以由我呢幾日個blog“爸爸”聲多左好多篇証明到。
我真係開始對呢個世界有返感覺喇，我真係對呢個世界有感覺喇！
我開始發覺有其他野係我鍾意，有野係我唔鍾意架喇！
我仲開始想話比人知我有咩鍾意，有咩唔鍾意添呀！
而家仲要識得硬頸，堅持自己想做既野添呀！
Javin、劍虹，呢兩個重要人物，就好似一個爸爸一個媽媽咁。
亞爸爸負責鬧醒我，迫我埋牆角，問我點解唔帶相機問到我唔識答黐埋牆。跟住我真係有返去反省，又真係省到少少喎！
亞媽媽就係度幫手贈返兩句緩和氣氛咁，仲要加埋間唔屎既鼓勵，肯定我做既野。
呢一陰一陽所組成既回魂大法，成功令我還陽之餘，好似比之前功力有增無減添呀！
開呢個blog因為兩個男人，不如第101篇就做個新開始，就為左呢兩個令我重生既男人而寫啦（唔係呀，我既意思係淨係呢一篇送比佢地咋）！
(講明！我同呢兩個男人乜野都無架下！好純架我地！)
遇到呢兩個人，我果種開心，都好想不停咁同人講我好開心好開心好開心，同上文一樣，講得多人地都嫌煩啦，所以，又係呢度講講講講講，講到夠為止啦！
你地明唔明架jet!有返火既感覺真係好開好開好開好開心架！
唉，睇怕都幾難有人明架喇. . . . . .
文章定位：
