自體實驗 吹時嘗試以己身進行實驗，將一套人人由細到大從益智卡通片灌輸之，但少數人會真正實行之價值觀，套用於自己身上。(假設套用方法正確) 再走入人間生態缸，在任由其他獵食者宰殺之前，作出最大反抗。 以証明自己所相信的價值觀，是我正確的選擇。 在此進行詳細紀錄，期待漫長實驗所結之果。

216愛的鼓勵 0訂閱站台

話說今日去電個靚髮,造型師係史力加,幫我做中間麻煩程序既既,係沙廊入面既學師仔,佢個名好似叫亞基喎~

係幫我整頭既繁複過程中,佢一路整整整,跟住佢師父叫佢用某隻藥水,佢竟然問返佢師父點解用果隻藥水而唔用另一隻藥水。
果一下,我突然由悶到發吽豆既吽豆之中,叮一聲,醒左!我見其他洗頭仔都只係哦哦哦咁,佢竟然問返轉頭!我見到佢心中有團火呀!!!
醒左之後,我再昅住佢落藥水個樣,真係好比心機咁幫我整個頭架,唔同其他d洗頭仔咁,雙眼無神,係度遊魂,師父叫佢做乜就做乜。

意以!!!!!!跟住發生既事,我自己都估唔到我會咁做,我竟然主動撩佢講野. . . . . .

吹 : 你. . . . . . 新黎架?
佢 : 唔係呀. . . . . . 做左半年喇. . . . . .(好明顯有少少不知所惜,又怕怕地羞咁)
吹 : 睇你個樣,你應該會做得長,你應該係呢行會有一番作為既!
佢當然會問我點解咁講啦,我就答佢,因為當師父點佢做野,佢唔會戇居居咁照做,而係佢會問返佢師父點解咁做。
佢開頭聽左,知道有d讚佢既意思,帶點客套地又或者可能佢唔好意思地,話唔想整衰我個頭所以會問清楚點做。
跟住我話比佢知,因為佢咁樣就証明左佢係有心學野,所以有前途,果下,睇得出,佢真有d好開心。

後來佢就開始同我傾偈,問我做乜. . . . . .
吹 : 我其實同佢做既野某程度上都幾相似,不過我仲係學生,讀graphic design既. . . . . .

佢 : 咁好讀大學牙,其實我都幾羨慕你地d大學生. . . . . . .
唔知佢真心定假意呢?因為通常呢d位都係用黎托下個客既大腳,不過我當時都無理,我話大唔大學生唔緊要,最緊要做到自己鍾意做既野。
佢 : 係呀,我真係好鍾意架!(應該係hair styling)
佢咁樣答我,我真係覺得好開心同好感動,真係真係好感動!

跟住我話比佢知,我仲係學生,無乜錢比貼士佢,就贈佢兩句咋,叫佢加油啦!
佢送左一個好純好真心既笑容比我。(以喂,開始有少少暈浪添. . . . . . )

以下落黎既工序,睇得出佢好開心又真係比頭先好心機左咁做,佢仲撩返我傾偈轉頭。
後來傾傾下,我問佢對呢行有冇d咩抱負,佢話想做個賺到錢既師父,我諗佢係個腦度仲唔係好清晰佢想要既係咩,於是我又話比佢知,佢想要既,其實應該係想要得到人認同,要得到人認同既話,就要. . . . . . (唔係度獻醜喇)
到走果時,我同佢講左句“希望下次黎會再見到你啦!”
佢又係一個可愛既笑容。

其實我咁大個女,真係第一次咁樣撩一個男仔講野法,但係當見到佢問返佢師父野果下,同埋佢比心機幫我落藥水,我真係好想用我既力量去鼓勵下佢。

我feel到佢撩我繼續傾偈,係因為佢真係覺得好開心,同埋佢真係想知道我講果d懶係心得。
我知道,我講既說話,係佢心目中一定會造成好大迴響,喜悅既甜美感覺會以迅雷不及掩耳既速度,由心窩擴散至全身,好想大聲咁笑出黎,但係又要忍住。
因為呢種感覺,我都試過,就好似當日我仲係香港既時候,某d人同我講過某d說話之後,我都有同樣既感覺,之後我個心就滿載而歸歸澳門喇。

喂!唔好吝嗇你既鼓勵說話呀!


死喇,越黎越似嫁唔出果d老姑婆惡死秘書喇. . . . . .係度騷擾年青戇直男同事. . . . . .
話時話,個男仔真係幾鬼可愛,又怕怕羞羞,又努力,仲要ok靚仔添. . . . . . 哎也. . . . . . 諗返起都有d暈浪. . . . . . 最衰係小朋友啦. . . . . .
哎也!!!今日爆頭果時仲比d髮卷卷到個頭成個小活佛咁添假. . . . . .