你亞三姨媽個契仔個大表哥個堂妹個姨婆關我屁事!＠自體實驗

2006-01-26 03:38:20| 人氣123| 回應0 | 上一篇 | 下一篇

你亞三姨媽個契仔個大表哥個堂妹個姨婆關我屁事!

推薦 0 收藏 0 轉貼0 訂閱站台

好難,我先至會接受一個人做我既朋友。
人要好,要真誠,會關心人,其實做到呢幾點已經好難。一旦接受左佢做我朋友,我就唔會輕易咁放棄佢。

有一隻人,當有一班人坐埋係度,佢把口就會停咁到咁不停發音,上至天文,下至地理,甚至會背埋本東週出黎添。
其實有d咁既人存在唔係唔好,至少唔會有冷場,同又可以增進無謂既知識。但係當一班真心既好朋友坐埋一齊,吹水,會令一個溫馨美滿既約會,毀於一旦。

其實我有好多近況想話比你地知,我好想話比你地知我係香港實習咩開心有咩唔開心,學到d乜,變得大個女左,我受既傷,好返喇。
但係,佢講既話題實在太精彩絶輪。
就好似佢係一份蘋果日報,我係一份明報咁,人往往都係偏向花碌碌既野既,而我呢份明報,雖然有心,有內涵(哇,咁話自己!),但係被都埋沒係蘋果報棟之中。

我曾經嘗試講我既野出黎,可惜蘋果報識既野實在太多,任何話題佢都可以搭到咀,你講一句,佢可以炒返佢亞三姨媽個契仔個大表哥個堂妹個姨婆既類似case出黎搭。一搭,就搭左去九重天外,而我既近況,就被沒入無關痛癢既精彩情節中. . . . . .

佢會做盡誇張既表情動作要你注意佢,聲音比單對單時高八度甚至更多,睇得出,佢真係好努力咁講,不停咁講。可能佢真係出於一番好意咁唔想有冷場,但係好對唔住,並唔適合係半年難得一聚既真朋友聚會之中。

當佢係度好努力咁吹既時候,我聽聽下,開始發吽豆,只係見到佢個口高頻率咁開合,內容對我黎講根本無意義!你講左你亞三姨媽個契仔個大表哥個堂妹個姨婆單類似case出黎又點jet!關我屁事牙!
咁難得先至見一次,我真係好想比你知道我既近況,我都好想知道大家既近況。做朋友既,唔想知道我既近況咩?唔想知係咪即係話唔關心我呢?
我唔想知道你亞三姨媽個契仔個大表哥個堂妹個姨婆既事呀!都唔想知你大姑奶個叔公個表姪仔個鄰居個細個個同學女既事呀!我只係想要朋友間既互相關心咋!

可能係我既presentation skill太差啦. . . . . .
又或者係我太天真,唔係個個都有責任要關心你架。

我要檢舉

台長：吹時

人氣(123) | 回應(0)| 推薦 (0)| 收藏 (0)| 轉寄
全站分類: 心情日記(隨筆、日記、心情手札)

回應(0)