女麻女麻話
“你爸爸細個好乖架,以前細個屋企窮,每日返學電車都唔捨得搭,寧願行路返學慳返埋個果斗令。”
我爹本來係香港,但係後來黎左澳門,係舅公間廠度做野,跟住識左我媽咪呢個靚女之後落地生根~
我娘話
“你爸爸對d下屬好好架,有咩都會好幫d員工。”
“我地以前係你舅公間廠度做野,跟住再由山寨廠做到而家。”
“你爸爸好鍚你架,不過佢係個心入面鍚無講比你知咋。”呢句應該係每個嚴父老婆都會講既對白。
對於我爹既過去,佢好少親口提到,多數都係由佢身邊既人口中聽返黎。
大部份我爹既資料,都係由我娘講比我知,其實我同我爹,都好少傾偈。
不過有一次我地又成家過香港唔記得做乜,經過我爹以前間學校,佢話比我知佢以前就係呢間學校返學架喇。
果一刻,我心入面真係好開心好開心,我好鍾意我爹咁樣講比我知佢既野。
我同我爹相處左大大話話都成廿四年,其實我都唔係好了解佢,我諗佢都唔係太了解我。
我爹細個既時候,就係果d?正牌既嚴父咁,平時唔會點出聲,就算成家人一齊食飯,飯台上都係得碗筷既聲音。
我地成家人都好驚我爹架. . . . . .最驚果個梗係我同我哥啦. . . . . .
聽聞我爺我女麻同我舅公都係好嚴既人。
我爺寫d書法好靚架,所以我爹都有一手靚字,同埋我爹個樣都好惡,平時又唔係點出聲,係果d不怒而威果隻。
我舅公聽聞話後生果時做過軍官. . . . . .
我女麻係個好話事既女人,連我爺都聽佢講. . . . . . .
我爹又係長子,係呢三大嚴人既調教下,再加埋佢本身係典型既處女座性格,可想而知我爹好自然都會成為一個好嚴肅既人。
不過我漸漸長大,個腦好似開左竅咁,除左驚之外,越黎越睇到其他野,同埋我爹又好似比以前和藹可親左好多好多。
其實我爹有時都會講下笑,果d笑大部份都幾好笑架,只不過就好少同我地講,大多數都係同佢d朋友呀親戚呀講。
我細個好唔明白,點解我爹可以對住人地咁樣講笑,但係返到黎屋企對住我地又木無表情,又惡喎,又唔出聲喎. . . . . .
其實都係因為佢係出面做野?姐,返到黎,唔洗專登討好我地,我地先至係佢最親既人。
對住最親既人,往往都係會最任性最唔洗扮野,呢點我越大越明白。
有一期,我爹身體好差,成日要過香港睇醫生,有一次食完飯睇緊歡樂今宵咁上下既時間,我岩岩沖完涼出黎,發覺坐係梳化上面既爹娘都唔見左人,係張台上面淨返個比煙?左張台既印。
後來先至知,原來我爹突然間心臟唔捨服,要即刻過香港睇醫生,急到連整熄支煙既時間都無,就由得支煙浪係個煙灰缸度燒到失去平衡,跌左出煙灰缸仲繼續燒。
其實我一直都唔知我爹咩事,我女麻問我爹點,我都唔知點答,再後來見到我爹背脊度有道疤痕,我先至知原來我爹做過通波仔手術。
有時,我爹又會蝦我娘,係度笑佢,我又會加把咀咁。(越大越發覺原來我娘傻下傻下,不過又幾可愛!)
呢個都係我覺得同我爹最近既時候,亦都係我好開心既時候,所以話我娘真係我地屋企既潤滑劑!
其實,我真係覺得我爹好叻架. . . . . .可以由一個乜都無既窮小子變成而家我所在既小康之家,雖然唔係咩大富大貴,但係都可以豐衣足食,唔洗憂三餐, ,又有亞珍煮飯比我食。
可以有呢個生活環境,我真係好感激我爹娘!!!
聽聞,我爹係一間製衣廠既老闆,事業都有過低潮,但係可以挨到而家,又經歷咁多風浪,我諗我爹都算係一個英明既君主。
記得好細個果時有一次廠度有個姐姐問我,我爹平時係咪成日鬧我,我話都唔算丫,佢竟然係度驚訝,因為我爹平時係廠係好惡,成日鬧人架喎. . . . . .
果一刻,我覺得自己好似一個小公主。
一個對全世界都咁惡成日鬧人既男人竟然會對我有特別既待遇,尤其是仲要係一個好似我咁既衰女包,優越感即時彪升。
話時話,聽聞我哥細個果時都好堪坷架,我爹對佢極嚴,我哥細個係品學兼優果隻黎架!
但係對我,我由細到大成績都唔係好架喇,成日都係班中尾十以內,仲要留左咁多次班,但係我爹都無乜點惡我,有都只係當我測驗唔合格果時醒我幾野咁,可能係因為我係女仔掛. . . . . . ?又或者因為我細個可愛d~呵呵呵呵呵~都唔係丫,我哥都好可愛架喎~
我無我哥咁驚我爹,可能都係因為呢個原因掛,同埋我諗我真係比我哥大膽d又任性d。
每當我出街同其他人食飯既時候,我見到其他人渣筷子渣到奇形怪狀,又或者食野唔合埋個口食到jepjep聲既時候,我都會心入面暗自感激我爹!!!
我爹間唔中會教我呢d咁細眉細眼既野。
例如包雲吞既時候,將紙巾包完一邊對摺再對摺再對摺咁包,包完既雲吞變成一粒立方體。
咁樣包法,就唔會揩到成面成手都係,尤其我同我哥呢d鼻敏感人成日狂包狂包. . . . .
呢d咁細眉細眼既無謂野,其實唔學都唔會死,但係呢d咁無謂既野,就係盡量避免係人前出洋相既方法,少左出洋相,人地就自然會覺得你優雅一點。
所以有時見我爹做某樣野某個動作,都會比較慢,但係其實咁慢既動作,做出黎乾淨俐落,減低出洋相既風險之餘,又可以免去處理爛攤子既時間。
又用返渣筷子個例黎講,我夾壽司好少會夾散舊飯,因為我渣岩筷子用岩道力,同埋會慢慢搵返個重心黎夾。
成日見到隔離,夾到舊飯散哂,係d豉油度唔知點執返佢好,佢快係快呀,但係結果變成搞到佢咁狼狽,我都好難唔為自己渣岩筷子而沾沾自喜。
我爹唔係有錢佬,但係衣著一d都唔失禮。
雖然佢著既衫唔係咩貴野咩牌子野,但係每件都料靚cutting好,望落去既感覺係大方得體。
其實著衫唔洗著到好靚,最緊要係著返適合自己既衫就得,佢既衣著,就真係正正符合一個小小既老闆既身份。
佢戴既錶,就印正住重質唔重量呢個態度。
有一日我去佢廠度,無聊搞佢擺左係度既一隻鋼帶勞力士,佢話比我知,隻錶仲老過我好多。但係我望落去,除左錶面有一兩條花痕之外,真係光潔如新!
咁樣既一隻錶,耐用之餘,又不失大體,抵呀!!!
果一刻,我又深受衝擊,呢種消費態度,直到而家我都係從未動搖過!
我知呢篇野將會比我爹睇到,因為我都有比呢個新聞台既網址我爹,而我爹仲會時不時就上黎兜返個冷添!
如果有留意開留低你既愛既家庭觀眾應該都知,之前有篇話公司個亞head蝦我咁,我之前果晚擺上去,隔左一日我同我爹娘食飯果時講,我爹竟然答到咀和!!!
又如果有留意開既觀眾應該都知道,我呢個咁既新聞台update係勁不定時,我果篇話比亞head蝦既野,之前係已經隔左好耐差唔多成個月都無update過,比著我都會唔點再理呢個新聞台啦,但係我爹竟然可以咁快知,可想而知佢真係有成日黎睇架!!!所以佢答我咀果刻我真係勁驚訝勁開心!!!!!!
我爹就係呢d唔聲唔聲,但係鍚囉~
今年四月既某日,我爹突然間打電話比我,問我有冇check喵,我無呀,跟住佢叫我快d check跟住覆返佢,問佢又唔講咩事,原來佢係封喵度問我想唔想要一張佢既附屬卡,一睇到,我又真係勁開心勁驚喜!!!!!!
唉~雖則我同我爹相對既時間,佢都係嚴肅既多,但係呢d間唔中既特級驚喜,我諗一般既小女孩真係唔會感受到, 如果平時既開心既指數十分為滿分既話,我呢隻開心一定係過十二!
我諗而家我爹係呢個世界上我唯一愛既男人. . . . .就好似好多小女孩咁, 希望第時第二個我愛既男人可以好似我爹咁叻,鍚佢既家人,有男人應有既決策能力,有品味,仲有呢d間唔中既特級驚喜。(面紅)
不過最好唔好好似我爹咁嚴肅同惡啦~
好多好多我爹以前既野我都係聽聞返黎,我好希望可以由佢口中聽到佢親口講佢既野,我再要努力努力搞好個關係先得~
唔覺唔覺,真係越寫越長,而家已經係朝早既七點零五分。
其實我寫呢篇野呢件事都幾肉麻,等同我寫封信話比佢知我有幾愛佢咁. . . . . .
以~~~~~~~~~~~~~~~~~~~~~~好肉麻呀~~~~~~~~~~~~~~~~~
此致我親愛既爹,除左生日快樂之外,成日都快樂。
文章定位：
