車天車地 一個有好多回憶既地方!!!

106愛的鼓勵 0訂閱站台

30-1-08(三)30-1-08(三)早上同d仔去了行吉之島同時尚坊，因為我地做緊project『購物』，行吉之島，發覺有二架新o既自動購物機，跟住行玩具部、服裝部，係Triumph個有售貨員主動同我班仔傾計，我問d仔佢係邊個，我d仔話係售貨員，跟住佢話佢一d都唔瘦，佢係肥貨員，佢真係好搞笑，搞到我班仔學佢講肥貨員，周圍counter d人都係度笑。

之後帶另一班仔去參觀，又係又見到呢位「肥貨員」，我見佢咁好傾，咪有同d仔講問下佢地知唔知佢係邊個，我提佢地係xx員，點知芊芊講動物園，hahaha，今次又搞到周圍d人係到笑了。

本身放5:00，跟住留係學校打埋d發展報告、同埋明天o既計設活動report(因為明天婆婆出殯我會放假，所以預先做定明天要派o既report)，搞到7點先走。行去紅磡街巿坐106過北角，再同埋mandy、偉仔一齊上去靈堂，真係好多謝兩位咁有心，重要你地連見都未見過我婆婆，都會o黎!(問心我自己本身對呢d地方都好避忌，極唔想去呢d地方。但你地o既行動，其實是給予我一個支持，使我將來面對同樣o既事情，我都可能願意去呢d地方，去關心我o既朋友!)

見到d法師都好後身，mandy話生o既人同死o既人都一樣多，呢行有得做。咁又係，呢d行業未必人人做到，又要有人介紹先可以入行，又要夾時辰...

D儀式做到9:30左右完了，跟住同阿姨佢地一齊離開殯儀館，一出門口，見到講野時，會出煙，一睇就知好凍了，重加埋落雨，真係凍到死。之後同阿爸阿媽、老樂，貞姨、珊珊、表弟、鷥姨、老趙一齊去食茶餐廳。

然後坐106去到紅隧再轉109回家。

31-1-08(四)9:30起身，梳洗後，同阿哥一齊的士去紅磡火車站，跟住轉102巴士去北角，11:00到達殯儀館，同大姨媽傾計，傾到做儀式，佢又講起話早排睇電話，話d大學生就去做法師，佢覺得讀咁多書唔應該做呢d野，以一般人角度，大學生的而且確有更多好的選擇，但做呢份工其實都係人地肯用勞力去做，總好過有d大學生攞埋自己d學費去炒股票，重搞到而家冇錢交學費，而家全民皆股，真係好唔健康。

12:00儀式開始，由於葬禮用道教儀式進行，我阿媽、阿姨都俾我唔上香、阿姨都叫我幫手摺野，我借顛2，冇去摺。我係到諗假若將來父母百年歸老時，如果用其它宗教儀式，我唔去做呢d野，到時可能會俾人話，所以我希望到時佢地已經信主，用基督教 / 天主教儀式進行，要努力d傳福音同祈禱。

儀式進行期間，我只係度諗我同公公婆婆會係天國相遇的。

跟住坐旅遊車去哥連臣角。之後再落番柴灣o既新翠商場o既酒樓食英雄宴。

食到2點幾，跟住同父母坐118返九龍，佢地就係紅磡火車站轉車，我就出旺角電負離子。

本來4:00去到髮型屋，都等到成4:30先有人得閒同我洗頭，個頭整到8:00，新年前夕，都只係加了$20，共$290，都算抵。

根住去棋社捉棋，只是同阿寶捉了一鋪棋，win了，之後同dranell、ken、志偉一齊外賣食pizza，dranell問阿ken關於d經濟理論，跟住我又問埋佢咩係次按問題。