車天車地 一個有好多回憶既地方!!!

106愛的鼓勵 0訂閱站台

21-7-07(六)返8:30，行到中途，醒起自己冇帶阿湯俾我個張學車卡，之前試過一次冇帶，佢已經開過一張俾我了，如今次再冇帶就不太好了(唔想給人壞印象)，諗諗緊好唔好放工12:30時回家攞，就突然醒起我連張駕駛執照都冇帶，呢張駕駛執照都冇得，咁點學車，所以一定要回家取。

返學校前想去吉之島買既KFC買早餐，但竟然未開門，9:30先有得買，所以返學校，返到學校時見到阿鵬企係門口都冇得入，因為佢同阿盧調了更，而又冇阿嬸返，所以冇問口入，我地只知校長問我地會唔會今日補時唔返，因為我地已叫曬d唔好返，預備裝修，但估不到阿嬸都冇人返8:00，校長你o既安排真係好失堂，完全冇遠見。

我同阿李返8:30，同樣係冇key，於是一齊去大家樂到食早餐，可憐o既阿彭7:55分已回來，佢已係門口食左佢既早餐。

我同阿李食到9:00左右，就三個一齊返上去，未入到學校已聽到鑽地既巨響，阿彭好興，因為d工人乜都未封就整野，同埋萬一有仔返學咁點算呀!d工人只話校長話今日可以開工，阿彭叫d工人停一停俾佢開工，工人冇聽，於是都好火咁叫佢地停，我有d愕然阿彭會咁惡，係佢打電話o既時候，廚師玉師又係到破口大罵，又話乜都冇通知佢，得佢一個係到搬野，佢上次個廚房又係d工人冇封野就整，搞到亂七八糟，佢鬧到好似撥婦罵街咁，真係好恐佈，話曬呢到都係學校，點可以俾外人叫到你有d咁既格。

講到尾又係校長o既問題，佢重咁大安旨意叫我地今日返o黎執野，但原來人地已經係做到沙鹿滾滾了，校長話佢唔知會咁大影響，oh…你係決策人同管理人點樣可以咁，有起事上來就話唔知，呢個咪就係你既問題lor。

後來d師父同我地一齊封野，重俾耳塞我地，大家一齊執呀,封呀,搬呀,一個鐘左右10點幾就攪掂晒,跟住又落番大家樂食早餐，我地傾到11點45先走，我冇帶車飛，諗住去吉之島買野，然後攞單換車飛，一來冇野想買，二來又好多人排隊俾錢，買得野o黎都未必有時間去換車飛，於是行去百佳搵我阿媽，好彩係百佳門口就見到佢，佢俾左車飛我，我再行番去車站都趕得切坐12:00既車，回家後要攞埋張學車卡同埋駕駛執照，跟住打電話去訂衫公司(訂華英summer camp衫)傾訂衫o既事。

12:45出門去訂衫公司訂衫，跟住坐6c去深水埗學結他。

學完結他去茶餐廳食下tea，然後入葵興學車，今日練到泊車都熟埋了，真係好。

學到6:10左右坐地鐵去德福，去阿卿屋企食飯，阿，佢到時阿卿同四姐、愛姐、嫻姐係到打牌，到阿卿去煮飯時，我就去燉下腳。

阿卿煮飯都ok，飯後睇香港小姐同傾計，阿卿同愛姐都係度講番去歐洲既經歷，阿卿同家姐去了15日歐洲，用左十幾萬，真係豪，因為佢地會買名牌同埋另外用d錢食多地野食，佢地都啱既，難得去到歐洲，同埋未必會再去第二次，當然用d錢食好d，以往我就未必會咁做，但聽完佢咁講，我將多都可能會咁做。阿卿話6月去歐洲既好時機，有機會撞到D國家既國慶，英女皇去渡假等，愛姐就話唔好8月去，因為D地方會關門，放假。而今屈個香港小組冠軍真係麻麻地，睇完香港小姐10:30就走了。

等緊車時，收到阿彭電話，同我SAY SORRY，因今朝食早餐時，佢話咩校長就請咩人，我即時就話我都係佢請架!佢驚我會嬲，其實呢句話我又冇嬲，因知佢唔係有心咁講，同埋我都冇當一回事，放在心上，所以都唔記得。不過阿彭同我都好似，會因為一句話而諗成日(冇論係講了得罪人，定係俾人講而唔開心)，但我好欣賞阿彭好有呢個改善既心態，不怕人地既批平，只求進步。

估唔到同佢傾左差不多成個鐘，話到校長既問題，佢都好唔開心，原來佢舊年諗住唔做時，有同校長講過佢o既問題，but校長冇改善，佢而家都好心淡，唔出聲就算。

在人不能，在神凡事都能，求天父介入我地中，保守我地o既心思意念，叫我地努力面對呢個挑戰同難關，更重要的係交予我們能力，去處理和面對各種問題和情緒。啊門!