「森」情小品文 ...

323愛的鼓勵 505訂閱站台

家陣尚算新正頭，都要同大家拜個年，祝大家羊年事事如意，新春大吉！

新春期間都要攞啲意頭嘢招呼大家，唔駛客氣喎～隨便！隨便！

紅瓜籽：寓意──抓銀…抓銀…

糖蓮藕：寓意──佳偶天成…

糖蓮子：寓意──連生貴子…

糖果朱古力：寓意──甜蜜歡樂…森伯對呢類賀年食品的寓意真係有限公司咋…

見到仲有糖椰子、糖馬蹄、糖薑（莫非指：萬壽無疆?!!）…真係唔知有咩寓意，有識之士不妨指教…

過年時候，總係覺得時間好快過，幾日假期就好似同一日，因為日日都差唔多…

所以以點點滴滴來講吓今年農曆年…

‧今年的年夜飯都幾特別，去返一間我們已經好耐冇去過的食肆做節，感覺裝潢新淨很多，食物的水準依舊──好！就算要去到深井都值得的！也是我們的集體回憶～

‧華人的農曆年都同動物有關，過年時見到係羊，聽到都係羊…幾乎發夢都夢到羊呀…今年唔畫羊的素描，要用太多時間，就咁即席畫隻Q版羊，慳好多時間XXD…我諗寓意都唔需要多講！Q版羊自然就係羊羊得意…

‧好多人都話今年天氣暖，所以好多年花都早開，家中的年花都係一般，見外邊的年花都係好一般…點都好啦，都係新春期間取其好意頭花開富貴咁啦！以前會溝亂牡丹跟芍藥…原來芍藥花都好大好靚！

‧過年期間，都不外乎食呀食…糕點就自然食唔少～至於過年都有啲特別食品幾有趣，先有姨媽（IKEA）朱古力…賣傢俬又有朱古力賣？！而朱古力一陣酒香味，我只係得個睇字唔會食…反而幾啱情人節送禮！

仲有一罐曲奇…與別不同佢係健康曲奇，用穀物堅果等造成，冇加牛油只用亞麻籽油製作，相當之健康不過味道就見仁見智啦（森伯講嘢好得體XXXD）

‧過完年又大一歲，眼見個個親朋戚友，就不其然感到歲月真係催人，又唔知森伯在各位親友的眼中又會否感到老呢？！我認為除咗講身體健康、恭喜發財之外、青春常駐都好重要！！無論男男女女都啱聽卦？！！