距離農曆新年的日子，都已經進入倒數階段，都年廿幾…正所謂年廿八洗下邋遢…本來都唔想又講過年，但始終呢個時候，人氣話題都離唔開過年，通常過年前都要執下地方，將唔要的東西清理下，試問香港地的地方又唔多，大多數唔要的東西一早就掉了！要執的就是一些碎碎的物件，有時都有幾多東西會儲起，以為日後會用得著，但到最後都淪為廢物，阻在房中…呢幾日我都算幾勤力，有些東西唔要就會清清佢…
在執拾的過程中，發覺最多就是電子配件，cable都有十幾條，平時見到都覺得凌亂，又唔知呢條是邊個電子產品，都要諗諗先～～而近排買了部新tablet…佢既廠商都算幾好，可以話佢幾環保（又可以話幾慳皮），乜cable都冇條！可能佢預你有其他cable，相機用的佢都用得，就唔需要太多電線搞到亂糟糟…
講開又講，而家的家庭相信冇十樣都有九樣的電子東西，有時一壞就好頭痕…唔知掉定買過部新…如果大家記性好的話，都記得森伯之前講過有部個螢幕全黑的數碼相機，結果當然都要放棄啦！整唔到…於是乎搵地方去處理，都打了很多有關的電話，結果諗都諗到啦～一部數碼相機，好多人都嫌太少唔會回收，就算打正旗號話回收電子廢物都得個講字，問到又嫌太少！！……後來搵到香港明愛的電子回收服務，呢個就真係值得讚一讚！就算一部數碼相機都照樣上門回收，冇聽錯，係上門回收！！呢個機構，才真正能為環保出一分力！！而且接線位職員小姐仲好有耐性與你對答！唔會嫌三嫌四……你唔好忘記我只係一部數碼相機咋！輪到自己都嫌自己太少喇！kakakakaaa…都冇謂叫人專程上門來收……因為我家的管理處有代客處理電子廢物的服務，於是乎拎落樓下交給他們處理好了！！
呢部相機仔細細部，貪佢帶出街影相方便…因為螢幕黑了不能拍攝，真可惜～～之前有些靚靚的Blog相都係靠佢影….
如果大家在大掃除清理時，有舊或壞的電子產品，都可以打去「明愛電腦工場」問問或上網睇睇詳情，尤其舊或壞電腦，佢地有師傅維修，整好後再轉贈比有需要人士，就算整無可整，佢地會適當地處理這些電子棄物！！唔錯架！
文章定位：
