島嶼紀事

70愛的鼓勵 0訂閱站台

阿爸在籠仔內

彼工起

目屎是阿母

向社會抗議的唯一方式

啥物號做良心

 

三十年公務人員的生活

伊的同事

厝一間買過一間

阿爸的厝

無磚也無瓦

只有阮兄弟

用冊疊起來的柱子

      〈冊頂講

         做人愛有良心〉

 

一位被告詐欺的包商

將厝給阿爸

辦理土地登記

伊講為著愛緊

每間兩佰元的條件

有證人會當做證

 

兩年後的證人

會當將阮厝前厝後

叼位種樹叼位種花

清清楚楚的講出來

記憶力實在好甲

驚人

 

阿爸從無承認

不管在調查局檢察官

到最後法院的推事

採用自由心證

兩年是逃不過的

劫數

 

阿爸走入籠仔內

彼個詐欺的包商

是將錢用在競選上

伊高票當選啊

                  〈是阮兄弟寫錯字

                      龍寫做籠〉

 

阿母的目屎乾啊

無人問原因

因為阿母無勢力

無錢使鬼推磨

只好叫阮兄弟仔

不通迷信

良心這兩個字

 

阮小弟

將良心放在腳赤頂

阿母的目屎

又擱開始流

         ─1981.9臺灣文藝21期