島嶼紀事

70愛的鼓勵 0訂閱站台

 

 

   小漢的時陣，阮攏將選舉的傳單，折甲賸候選人的相片，當做尪仔標咧七逃。

   毋管是國民黨抑是黨外的候選人，只要會當乎阮贏，阮攏會將彼支尪仔標當做寶貝。

   尪仔標的候選人，一路陪伴阮大漢。

 

   讀冊的時陣，冊頂甲阮講，咱攏是中國人，偉大的蔣總統是民族的救星，咱著愛反攻大陸，「解救水深火熱的同胞」。

   彼咧時陣，阮嘛對人寫著誠多三民主義統一中國的文章。寫甲足憤慨，但是越寫心煞越虛，中國到底佇叼位。

 

   阮的心內越來越濟疑問無塊問，只有偷偷仔讀著一本擱一本的禁冊，台灣的形影越來越清楚的徛佇阮的目睭前。 

    但是，少年的時陣，阿母甲阮講，政治毋通插，二二八白色恐怖太可怕。

   毋管阿母按怎講，阮猶原走去政見發表會，徛佇台仔腳，大聲小聲喊，喊出台灣人出頭天。

   驚嚇但是爽快的暗暝在阮每一咧夢中偷笑。

 

   美麗島事件的發生，乎台灣歷史的發展開始改變，充滿著理想、自由思想的人越來越濟，阮嘛佇四界寫著真濟反對國民黨的文章，彼咧時陣，阮看著「有夢最美，希望相隨」的未來。

   二000年三月濟濟的人攏咧歡喜，國民黨長期統治的的時代結束仔，台灣第一擺的政黨輪替，乎濟濟的人充滿著向望。

   阮親像看著台灣已經走著家己的路，走入一咧有家己的文化的世界。

 

   二00八年，已經過了八冬，八冬來，阮的熱情一工一工消失，彼當年充滿著理想的人，為啥物無法度徹底消除國民黨執政時陣的歹習慣，為啥物無法度乎咱台灣變做一咧全新、凊氣的國家。

   阮實在袂當忍受「國民黨執政時陣的嘛是按呢」的講法，既然已經掌握權力，著應該將不對的代誌不對的制度全部做改變，但是，咱看著的煞是一齣不斷發生腐敗的連續劇，所有的連續劇到最後一定是歹人死了了。是毋是歹人應該死仔，所以才會發生二00八第二擺政黨輪替。

   阮親像轉去國民黨統治的彼時陣。

 

腐敗的代誌已經有夠濟，想不到佇欲落台的前規工，竟然會擱爆發擱卡大條的巴紐外交事件，牽涉的人竟然是彼當年充滿著理想的人，乎咱親像轉去國民黨統治的彼時陣。 

佇第二擺政黨輪替確定，咱看袂著執政黨有任何反省，對著台灣主體意識，咱看袂著有任何向望，但是自從發生巴紐外交事件了後，相信會乎誠濟新一代有理想的人徛出來，親像彼當年，濟濟的人徛出來共款。

轉去卡早，咱著會看到希望。

 

 

                                                                 ─二00八年五月十三日台灣時報