【潑墨館】—給失眠的人解解悶 秋夜，微風，細雨綿綿。 推窗，舉頭，尋月。 放眼，尋遍，滿目石屎，明月何曾見﹖ 既暮，八方無聲，俱寂矣。 天地悠悠。 身處斗室，如陷圍城。 唯有扇獨轉。 —隨感錄之廿九〈圍城〉

987愛的鼓勵 0訂閱站台

        晏晝搭281A去旺角。當巴士去到彌敦道近始創中心對出嘅時候，我身後有個阿嬸望出窗外，面露驚訝咁「啋﹗」咗一聲。我順住佢嘅視線望去，見到有位着住白 色底衫嘅阿叔喺人來人往嘅街邊對住條車來車往嘅馬路痾尿。單係痾尿佢顯然都唔滿足，因為佢一路痾一路左搖右擺，條潔白嘅尿柱(睇嚟佢身體都算健康)時而向 左射、時而向右FING，高低起伏不停。阿叔則一臉得意，玩完尿柱之後，施施然抖兩抖，然後揚長而去。

        我當堂睇到呆咗。唔係未見過人當街痾尿，不過我真係未見過有人夠薑到對住條馬路嚟痾尿。而且呢條仲要係人流如鯽嘅彌敦道﹗我不禁諗起幾年前喺西安，見過有 個細路着住開襠褲，當街痾屎嘅盛況。其他人仲要掂行掂過，眼尾都唔望下，好似慣晒咁。本來諗住呢一道咁有中國特色嘅「城市風景」只會喺大陸出現，萬估唔到 我咁有幸喺香港都遇上。你哋唔好以為個阿叔一定係國內同胞，我睇佢個樣「香港人」到不得了﹗

        我諗呢件事已經唔可以單從公德心去睇。應該用心理學角度去分析點解佢可以咁勇者無懼。不過我唔熟悉心理學，所以唯有估佢大概係逼不得已嘅。作為一個愛國愛 港但唔愛共產黨嘅香港人，我實在唔願意承認香港人既質素已經低到咁嘅程度，簡直係倒退到幾百年前。於是我自欺欺人咁諗，佢會唔會係另有苦衷嘅呢﹖比如話， 佢根本搵唔到廁所﹖所以先就地解決﹖

        話時話，旺角區又真係幾難搵廁所。每次去到旺角，急起上嚟，總係萬分狼狽。如果開細，求其搵間商場搞掂都可以，又或者去幫襯行人專用區間KFC個廁所。不 過大家都知旺角區啲廁所有幾污糟架啦(註1)，萬一急屎，就認真頭痕。咁大個旺角，竟然冇個稍為乾淨啲嘅廁所俾人痾屎﹗真係要向嗰度嘅民建聯區議員投訴 下，叫佢快啲「成功爭取起個乾淨廁所」至得﹗搞到我每次急屎，都要千里迢迢咁行去朗豪坊度痾，就算我身在旺角東火車站，都要逼住山長水遠咁仆去朗豪坊，真 係「粒粒皆辛苦」﹗

        後來我學聰明咗，與其周圍咁搵，不如去相熟嘅漫畫茶座度解決。反正我嘅活動範圍主要都係行人專用區一帶，咁就索性上去「漫畫放題館」度痾。嗰個廁所嘅衛生 程度還可以，我去慣去熟，痾完仲可以睇漫畫，真係一舉兩得。收費方面，大約係一個鐘十八蚊，計落如果痾十分鐘嘅話，痾一次屎先至三蚊，總好過要周圍搵吖﹗ 更何況我一向慳家，個半就搞得掂啦﹗

        不過間野衰在收舖收半夜十二點。有次喺旺角睇完午夜場凌晨兩、三點人有三急，周圍都搵唔到廁所。諗住去廿四小時開放嘅麥記解決啦，點知就偏偏撞正佢嗰日個廁所要維修﹗啲商場又已經收晒，連啲茶餐廳都故意貼張「本店廁所不設外借」嘅字條出嚟，真係吹漲﹗搞到我戇居居嚮旺角兜咗成粒鐘都痾唔成，結果行咗成粒鐘先至醒起花園街有個公廁﹗

        呢個故事教訓大家，千祈唔好嚮半夜三更喺旺角急屎急尿。如果你驚會遇上同樣遭遇，就要緊記以下呢個旺角公廁位置一覽表喇：

一、洗衣街公園公廁：洗衣街公園
二、洗衣街公廁：洗衣街188號
三、聯運街公廁：聯運街食環署九龍車房側
四、旺角道公廁：上海街661B，上海街與旺角道交界
五、博文街公廁：深旺道1號奧運站
六、砵蘭街公廁：砵蘭街193號
七、奶路臣街公廁：廣東道1024號
八、晏架街遊樂場公廁：晏架街遊樂場
九、洋松街公廁：洋松街105號

資料來源：食環署網頁—九龍區公廁列表

註1：可以參考2000年民主黨《公廁衛生情況問卷調查》