台南縣玉井鄉余清芳紀念碑旁的[綠色空間 ]田園餐廳，可以180度鳥瞰新化丘陵地的秀麗風光 。(沂/攝影)
相連續透幾落日雄狂風了後，風勢有khah恬靜淡薄，海裡風湧平波，是船隻thìng好平安出航的日子。今仔日1662年2月9日。時間袂輸予無情的歷史擋恬。毋管按怎，我Meij註定無離開蹛欲20冬的Formosa袂使，被逼愛坐東印度公司的船前往Batavia（巴達維亞）。因為Zeelandia（熱蘭遮城）規個落入Coxinja[1]（國姓爺）的手頭，伊親身tshūa領一陣武裝兵士，ùi已經崩敗的烏特勒支碉堡，騎馬向角城的後爿行過，佇遐進入Zeelandia。仝時，受Coxinja界管的各社原住民婦仁人佮囡仔，嘛予伊下底的官兵挨挨陣陣趕入Zeelandia。
我這陣徛佇大員港邊。儘管天色烏陰、咧落sap-sap仔雨，毋過，對予荷蘭東印度公司派來Formosa成作土地測量師欲偎20冬的我來講，雖罔因為Coxinja拍敗荷蘭人、佔領這塊美麗之島，我才著離開ùi少年徛居到中年的第二故鄉，總是，帶著這款oh得講出嘴的心tsiânn離開Formosa，對我來講，減采是一世人無法度放袂記的深窩記智。
我khah久都攏會記得，1661年5月4日頭擺佮Coxinja見面的情景。佇見面的四日前，我踮赤崁市鎮聽眾人咧會講，Coxinja彼工tshūa領幾落百隻戰船，順漲流的水勢作一下駛入鹿耳門港道。自Coxinja踏上Formosa土地彼時開始，阮的苦難就一件續接一件，一直無停睏。5月4日過晝，我身軀頂紮一封Coyett（揆一）長官授權赤崁地方官Valentijn佮對敵講和的簽約條款，參另外一位土地測量師Verbiest作伙來到Coxinja的軍營。當阮來到Coxinja軍營附近的時，hông擋咧一睏，進前佇大員脫逃的何斌，才ùi軍營方向行來佮我握手，伊講Coxinja真向望欲佮阮見面，閣講阮只要照荷蘭人的禮數就會使，毋免行另外大禮。講煞，伊kā彼封簽約批ùi我手頭抽走，斡頭tshūa阮行向軍營。
He軍營面頭前雙爿邊各徛三排護衛軍，看起來量約有七、八百人的款勢。現場予風絲仔吹kah
phia̍t-phia̍t叫、用烏色綢緞做底的軍旗，khōng一khih一khih的紅邊以外，頂面用金黃色緻的絲線繡獅頭佮龍頭。遐兵士手裡舉的刀槍利劍劍，照著過晝的日頭光金熾若銀，in身穿戰甲、戴的鐵帽仔頂有一簇鬚鬚的紅毛，看起來相當有古典味，袂輸古早羅馬帝國的兵士款。阮愛ùi這陣兵士的中央行過，行到半中途的時，我的仝伴Verbiest
hông兜牢咧，我予人tshūa到Coxinja的軍營頭前。
我行到軍營前，按算用荷蘭人的禮數向Coxinja行禮，想袂到有兩位官員suah喚我跪落。我當該然kā in拒絕，心內想講拄才何斌明其講行荷蘭禮數就會使，哪會到位隨變一個款，敢講這就是支那人的待客之道？毋過，in無容允我躊躇，隨一人一爿出力tshi̍h我的肩胛頭，強猛押我跪落離Coxinja三步遠的紅地氈頂面。我tann頭看Coxinja，伊坐踮帳幕正中央的桌仔後面，桌頂tshu一條不止仔貴重款的桌巾。伊身軀穿一領未曾漂白的麻紗質長袍，頭殼頂戴咖啡色的尖角帽，帽仔墘量約一個大頭拇闊，帽仔頂thīnn一塊小金片，小金片頂面插一枝白色鳥仔毛。伊的後壁面雙爿邊各徛一位身穿烏色長袍的少年家，隨人手舉一面量約懸八呎、闊三呎的鍍金扇。伊的雙爿邊徛五、六位穿烏袍的重要官員。
Coxinja看起來40歲跤兜，中範體格，面貎四正，白肉底，目睭烏閣大蕊。伊彼兩蕊目睭tsiânn無時閒，不管時gîn來gîn去四界巡視。伊的嘴不時開hā-hā，嘴裡四、五齒長長閣磨kah圓圓的嘴齒看現現。嘴鬚無濟，毋過，長lòng-sòng留到胸坎。伊講話的聲嗽不止仔有威嚴，袂輸咧喊喝閣嶄然仔激動，嘴ná講話身軀ná有怪奇的動作，假若欲用雙手佮雙跤，予規個人飛起來的模樣。
反背荷蘭人的何斌kā我紮來的批交予Coxinja，Coxinja出力將批囊拆開，抽出內中的批紙展開來讀，伊ná讀ná tìm頭，批讀煞先家己大聲喝咻，了後對我、何斌閣有踮伊身軀邊彼幾位官員大聲喝咻。我一句都聽無伊咧喝咻啥？落尾透過何斌的嘴翻譯，我才知影Coxinja的意思。伊講，本底已經簽發命令，拍派兵士攻打蹛佇赤崁市鎮的荷蘭人，假使阮若反抗，無第二句話隨kā全部的人刣死。不而過，伊講算阮好運，伊現此時已經改變主意，m̄-nā欲留阮活命，尚且嘛同意批內條款的內容，甚至連阮的土地、厝宅佮所有物件，攏會當親像永過仝款繼續使用；伊干單堅持一件代誌，就是毋允准阮去大員。我對Coxinja講，我無被授權決定條款內面無寫著的事項，拜託伊予我書面答覆，閣差派官員佮我作伙去見地方官Valentijn。Coxinja目睭展大蕊聽我講煞，隨手舉毛筆，佇條款雙爿邊佮下底，寫幾落個紅色的四角字。寫了，伊tann頭掠我相一下，即刻差派官員楊朝棟，佮我鬥陣去Provintia（普羅岷西亞）城堡見Valentijn。
來到赤崁市鎮，看著規條長長的街仔路，ùi小山崙仔到海邊，徛kah滿滿是的武裝兵士。楊朝棟留佇市鎮的衙門，向望阮喚地方官到遐參伊見面。我轉到城堡見地方官Valentijn，向伊報告代誌的頭直來尾直去。地方官差派我佮秘書去赤崁市鎮，叫阮暫且留佇遐成作人質，請楊朝棟到城堡的木柵參伊講話。楊朝棟干單留秘書作人質，綴我到城堡的木柵，參地方官Valentijn一內一外徛咧講話，兩人對話有一睏仔，落尾雙方同意，kā條款內面欲前往大員的部分攏改作Batavia，只要地方官一接著Coxinja簽名頓印仔的合約書，阮兩日內就會撤退離開Provintia城堡。楊朝棟轉去無偌久，隨騎馬提一封Coxinja的批，佮兩面畫獅畫龍的黃旗，向望隨時掛踮城堡頂懸，地方官認為彼封批的條款寫了無夠清楚，拒絕接受批佮兩面黃旗。過無偌久，楊朝棟閣佮一位官員作陣騎馬紮一封Coxinja的批，希望地方官嘛tshūa一位官員，去軍營當面佮Coxinja隨條隨條kā條款講清楚，伊本人願意留落來做人質。In兩人參詳tsiânn久，地方官接受楊朝棟的建議，tshūa領一位官員佮兩個兵士作護衛，作陣騎馬到Coxinja的軍營。
地方官去見Coxinja無偌久的時間，就轉來城堡，身軀邊綴幾落位打扮齊整的人士。佇in面頭前，量約有一、二十個穿紅衫的人，一面行路，一面大聲摃鑼、歕鼓吹。這陣人的後壁面，閣有四個人扛一塊tshu紅絨仔布的厚枋仔，頂面囥一su紅綢繡金黃絲線的官袍，一條khōng金藍色布邊的絲質腰帶，一雙烏色絨仔布thīnn金蔥的官靴；上界顯目的，是彼頂佮Coxinja所戴相像形體、色緻的帽仔，頂面仝款插一枝白色鳥仔毛。我徛佇城堡頂面向下看，看會出來地方官Valentijn嘴笑目笑的歡喜樣相。伊徛定了後，真簡單三、兩句話對眾人說明條款的內容。伊講，大員以外，阮欲去Batavia抑是其他所在攏會使。照品照行，阮兩日後就愛離開城堡，作伙去蹛佇赤崁市鎮。Valentijn話講煞無到十分鐘，進前Coxinja差派楊朝棟紮來彼兩面大黃旗，已經升起哩城堡懸懸的旗竿頂，予風搧kah
phia̍t-phia̍t叫。
1661年5月5日。透早，Coxinja派人送來一匹馬，喚地方官Valentijn佮伊作陣騎馬去大員。另外，嘛愛紮紙、筆佮墨水，伊欲寫批予大員長官Coyett。逐擺阮若去見Coxinja，逐擺攏愛跪咧塗跤兜。今仔日我看著佇Coxinja軍營門口埕，有16位原住民的頭人徛作兩排，遮的頭人是新港社[2]、蕭壠社[3]、麻豆社、哆囉嘓社[4]、目加溜灣社[5]的長老。In身軀頂穿的是繡金黃絲線的藍色官袍，khōng金邊的藍色腰帶，頭殼頂戴的是佮Coxinja仝款形體的帽仔，毋過，頂面插一簇鬚鬚的紅毛，參Coxinja下底的兵士仝款仝款。
日頭大出了後，地方官騎馬綴Coxinja佮伊全部兵士作陣起行，經過鯤鯓去到大員。留守踮佇赤崁的對敵干單偆四、五百人，所有戰爭用會著的砲彈佮傢俬，攏搬上戰船駛去大員港。欲偎中晝，Coxinja的軍隊ùi海面佮陸地漸漸偎近大員的時，砲彈齊發，砲聲lìn-lòng叫，大員市鎮裡的木材工場四箍輦轉佮海港對岸大火衝天；有一時仔，Zeelandia城堡頂面的砲彈嘛袂輸落一陣西北雨仝款，射向Coxinja的登陸部隊。
1661年5月25日。Ùi天拍殕光到中晝前，規個大員砲聲震動天，雙方戰kah濛煙散霧。欲暗，地方官Valentijn
ùi Coxinja彼tah轉來講，今仔日是對敵的部隊頭擺敗戰，而且死傷累累，戰死千外人，著傷的嘛濟kah七、八百人。這幾日，Coxinja下令kā
Provintia城堡頂面的大砲齊搬走，差派下跤手人拚kah清氣tam-tam，聽講伊按算欲長期踮遐徛居。Ùi Coxinja最近的一寡作為，我深深感受伊好親像咧驚阮遮的受伊控制的荷蘭人起叛。比論講，伊kā所有的荷蘭兵士佮猶未結婚的人，攏徙去蹛踮新港社參目加溜灣社，伊的理由是遐的所在有khah好的生活條件，thìng好自在掠魚、剉柴。目光的人敢看無伊咧變啥把戲？
前兩日，有一個麻豆社的原住民向Coxinja密告，講有兩位荷蘭通譯kā伊討酒啉，伊毋肯就in，in
suah kā嗆聲講，明年會有phīng樹葉仔閣khah濟的荷蘭人來Formosa，時到in會kā支那人刣kah臭青荒。遮的話袂輸秋風掃落葉，真緊傳到Coxinja的耳孔邊。這聲袂直矣，結局這兩位荷蘭通譯就佇阮的面頭前，活活hông一人釘佇一塊柴枋仔頂。我看著in雙手相疊khùe咧頭殼頂，手蹄仔hông釘一枝鐵釘仔，兩枝手後蹺各釘一枝鐵釘仔，雙爿跤頭窩兩指懸的所在各釘一枝鐵釘仔，兩枝跤踝各釘一枝鐵釘仔，一人攏總hông釘七枝鐵釘仔。In就按呢hông
tshāi咧赤崁街頭示眾。
楊朝棟向Valentijn傳達Coxinja的命令。伊講，毋准為這兩個hông釘佇柴枋仔頂的荷蘭人做任何代誌，袂使予in食物件、啉水，閣khah袂使予in提早斷khùi。上界僥倖的是，伊閣命令阮愛差派六個人輪班顧守，袂使予人偎近。彼兩位荷蘭通譯，自hông釘佇柴枋仔頂開始，袂輸孤魂野鬼，哀叫的聲音無時停；到kah半暝，天頂的月娘偆一眉仔，我倒佇眠床頂píng過來píng過去，in兩人hainn-tshan的聲，假若一枝無形的利箭，thàng過樓窗射入我的心慒。
隔轉早，天拄拆ha̍h，in兩人就hông綁咧牛車頂。續落來兩日，輪流載去新港社、蕭壠社、麻豆社、目加溜灣社遊街示眾、刣雞教猴。其中一位荷蘭通譯，佇ùi新港社欲去蕭壠社的半中途就來斷khùi，另外彼個，嘛佇目加溜灣社過身。
Coxinja m̄-nā對待荷蘭人酷刑，對待伊下跤手人閣愈殘忍。比論講，伊的兵士若犯伊訂的律法，毋管輕重罪，攏會hông刣頭；甚至連將官敗戰，仝款押出去刣頭；這款代誌毋是孤例，thìng好講逐日都搬演幾落回。有一擺，幾落個有親晟關係的兵士，內中有人佇赤崁揣著踮遐做穡的兄哥，in已經tsiânn濟冬毋捌見面，歡喜到地，tshūa逐家轉厝裡好禮仔款待。這個兄哥揀一隻家己飼的細隻牛，刣來請人客，眾人嘛出手鬥相共，作伙享受兩、三日。落尾，hông密告到 Coxinja遐，翻轉工透中日晝，全部的人攏被押去赤崁街路中斬頭。佇Coxinja所訂的律法裡，私人欲刣豬屠牛攏愛先經過伊的允准，若無死路一條。
我幾落擺親目看過in處治死刑犯的情景，實在予人看kah跤手尾phi̍h-phi̍h-tshuah、心驚膽hiannh。In欲kā死刑犯刣頭進前，攏會先kā犯人的衫褪掉，予in頂半身褪腹體，雙手綁iap後，kā一枝量約手掌展開、ùi大頭拇到尾指長度的竹仔枝，橫囥咧犯人嘴裡，將竹仔枝的兩頭佮雙爿耳仔綁鬥陣，予犯人無法度講話。In佇處斬犯人進前，會先大隊人馬街仔路踅一輾。五、六個摃鑼、歕鼓吹的人做前；後爿綴一個人手舉一面大烏旗；續落一個人手舉一塊罪狀牌，頂面寫大大字的四角字，邊仔頓紅色官印；了後，就是掛手釦、跤鍊的死刑犯，刀斧手行佇伊的倒手爿，手裡ân-ân
la̍k一枝出鞘的大刀，刀尖向天，照著透中晝光炎炎的日頭光，現出一道強烈銀光；煞尾是死刑執行官騎馬押後。行到刑場了後，攏無任何特定程序，刀斧手出力tshi̍h死刑犯的肩胛頸，予伊跪落地，一目睨，刀起刀落、頭斷血霧；執行官看行刑完事，隨快馬加鞭，趕轉去向Coxinja報告。這時，鼓吹聲停睏，大面烏旗嘛ùi旗竿頂提落來。刀斧手倒手sa死刑犯的頭鬃，正手la̍k大刀；伊的頭前一個提大鑼的人，三不五時khiang一聲，袂輸咧kā斷頭的死刑犯引魂；舉罪狀牌的人綴in後壁面，作陣將人頭提去予Coxinja確認煞，才閣佇規個部隊踅一輾。
雖罔，Coxinja無親手舉刀斬斷犯人頭殼，毋過，我好親像閣看著頭擺佮伊見面的時，伊彼種目降鬚氅的驚人模樣徛踮我面頭前。
過無偌久，Coxinja就將Formosa的大遍土地分封予伊的文武官員，每一位官員會當分著ùi南到北、路程量約八點鐘久的領地，每一塊領地的中央地界愛砌造一座城，成作官員徛居的所在。我佮另外一位荷蘭土地測量師，hông派去ùi麻豆社欲到哆囉嘓社的半路開始測量第一塊土地。沿路經過哆囉嘓、諸羅山、他里霧[6]、貓兒干[7]、二林遮的地頭，規路坎坎坷坷，拄著落雨全全路糊仔糜，食si̍t
bái閣無衛生，照這款扮勢，閣按呢落去免幾工，阮若毋是無命，嘛會破病kah tsiânn傷重。好佳哉，佇二林的時，接著命令停止測量，回轉赤崁。
1661年9月16日。早時，停踮Zeelandia城堡頭前有五隻荷蘭船，ùi遐駛過大員市鎮，隨時準備欲對Coxinja的戰船爆擊的款勢。過一時仔，強猛的砲彈ùi雙方的戰船佮陣地射向對敵，袂輸欲kā大員的烏陰天拍破相像。落尾，荷蘭船駛來停踮北汕尾，ùi彼tah予兵士換坐十外隻小船，按算欲向對敵直透撞過決死戰。結局，幾隻荷蘭小船予Coxinja的戰船逼kah靠底，另外幾隻予對敵的火罐燒著船帆。終其尾，量約五、六十個荷蘭兵士予對敵掠去赤崁，Coxinja目睭展大蕊，掠這陣戰犯看一下，問無三句話，就下令kā
in斬頭。欲hông斬頭進前，遮的戰犯攏被灌厚酒，灌kah無法度出聲講話。上界殘忍的是，Coxinja命令佇赤崁的荷蘭人處治戰犯，這款強逼軟tsiánn荷蘭人刣死同胞的粗殘手段，實在講，phīng豬狗禽獸閣khah不如。
隔早起，楊朝棟提一張Coxinja簽名的書面命令予地方官Valentijn，頂面寫講，伊佮所有下跤手攏會hông送去支那沿海，了後閣ùi遐坐船去暹羅，隨時愛上船。Valentijn毋願屈從，要求欲照當初簽的條款參Coxinja當面講清楚，毋過，Coxinja無欲答應見面。三工後，Valentijn無其他選擇，只好鼻仔摸咧tshūa某囝佮一陣下跤手作伙上船。彼暗，病kah不止仔傷重的政務員Verhagen佮土地測量師Vrijaltenhoven，予支那兵用舢舨仔船載去新港社。閣過幾日，我佇街裡拄著一個ùi新港社來的原住民，探聽著政務員佮其他hông
tshūa去遐的荷蘭人，攏已經予支那兵斬頭；另外一位Coxinja下跤手的葡萄牙人kā我講，土地測量師佮幾落個荷蘭人，攏被押去溪仔邊刣頭，屍體猶撣佇遐。
1661年9月24日。今仔日去探訪幾個ùi麻崙社[8]來赤崁的婦仁人，in內中有荷蘭傳道、教師的牽手，閣有兩位兵士的本地某。In看著我來，攏現出哀怨的眼神，目屎流目屎滴，kā我投in受苦毒的經過；in講，支那人kā
in的翁婿佮麻崙社就近的荷蘭人攏刣死，閣搶走in所有的物件，甚至kā in褪衫褪褲；這也莫怪，我去看in的時，in大體上是現胸露體的情景，予人看著tsiânn毋甘。離開遮的婦仁人了後，我隨轉去喚阮家後kā
in tshūa轉厝裡蹛、順續hiannh幾領衫褲予in遮幔。了後，我隨去揣楊朝棟請伊予我一個交代，伊答應會揣出兇手照律法處治，而且頓胸坎保證，這層代誌佮Coxinja一點仔tī代都無。離開楊朝棟欲轉厝的路裡，拄著通譯Maijcko，ùi伊嘴裡聽來的佮楊朝棟講的全然無仝；Maijcko講，是Coxinja下令將所有荷蘭人刣死，因為伊欲報復進前大員戰爭的時，一個荷蘭兵士舉大刀橫腰斬死伊的軍官。
過無幾工，進前予Coxinja派去南爿的部隊轉來赤崁，毋過，人數干單偆本底的三分一，遮的人大體上看起來黃酸、衰弱，減采是枵飢失頓兼破病的緣故所致。這暫仔飢荒愈來愈嚴重，使致兵士死亡的人數日日增加，脫逃的嘛làng時無làng日，偷走兵若歹運hông掠轉來，無第二句話隨押出去刣頭，我捌看過二十外個因為身體堪袂去偷走兵、hông仝時佇赤崁街裡斬頭的場面。
儘管Coxinja的兵士死傷累累，伊猶原派人佇Zeelandia城堡對面的北汕尾，砌一座tsiânn大座的砲台，頂面tshāi袂少管大砲，目的是為欲阻擋荷蘭船入港。
最近我一再揣機會，想欲tshūa我的牽手佮其他荷蘭人，作伙脫出對敵的手頭，逃入Zeelandia城堡。雖罔我有提一寡錢，拜託信任會得過的兩位支那人，設法幫助阮脫逃，不而過，一直揣無妥當的機會。有一擺，兩個荷蘭兵士走來投靠Coxinja，內中一個奸巧的人出賣我。伊kā
Coxinja講，我捌差人去Zeelandia城堡通知Coyett長官，只要派兩、三百人來赤崁市街放火，就thìng好輕輕可可將對敵拍敗，時到，我會kā
Coxinja交佇長官手頭。講來怪奇，減采無所不在的天父上帝保守我，通譯竟然食好膽藥仔，佇Coxinja面頭前kā講話內容翻tîng-tânn去，予我逃過一劫。落尾伊有kā我講，伊當場威脅彼兩個投降的荷蘭人，叫in毋通閣提起彼件代誌，若無生命會休去。通譯叫我免驚，只要有機會，伊願意kā我鬥相共。毋過，我猶是無啥信會過伊講的話，要求欲親身去向Coxinja說明遐陷害我的白賊話。伊kā我嚴厲警告，只要Coxinja聽著遐的話，無論ùi誰的嘴裡講出來，伊定著隨下令將我釘踮柴枋仔頂。
落尾，有一位ùi
Zeelandia城堡脫逃來投靠Coxinja的士官Rade kā我講，事實上，伊是Coyett長官派來欲暗殺Coxinja的人。伊講，Coxinja的隨身紅衣護衛量約八十名，伊一擺刣掉兩、三名，免幾工就thìng好全部解決好勢。有一擺，Rade予Coxinja請去作客，伊竟然徛起來當面kā
Coxinja講，我佮另外兩位醫生早慢會敗害大事，使弄Coxinja將阮刣掉；想袂到Coxinja suah顛倒笑kah攬腹肚對Rade講，伊對阮跤底有幾枝毛tsiânn清楚，諒必阮毋敢濫sám來。這件代誌，是一位彼工咧顧守Coxinja房間口的葡萄牙人好心kā我講的。相連續兩擺攏差一屑仔予荷蘭同胞害死，使我感受若閣繼續踮佇Coxinja身軀邊，風險會ná來ná大。彼位好心的葡萄牙人私底下kā我講，伊佇Coxinja下跤手做代誌，m̄-nā食袂飽、穿袂燒，tsit-má有歲矣，嘛仝款著愛做粗重的穡頭，所致伊想欲和阮作陣偷走去Zeelandia城堡。伊講，甘願成作Coyett長官的監囚，嘛毋願閣服侍Coxinja矣。
有一寡因為贌租抑是其他緣故借錢欠siàu的做穡人，予Coxinja下跤手催kah足厲害，所有債務限in三日內愛還清，若無，會掠去官府褪褲用柴棍仔摃尻川phé；頭擺摃三下，第二擺摃五下，第三擺摃十下，加倍摃落去；若閣無還，落尾會被掠入監牢食免錢飯，佇內底，in用一塊長、闊兩呎半，兩枝大頭拇厚的四角柴枋仔，架踮犯人的頷仔頸頂，一掛就幾落月日，予in根本都無法度倒落歇睏，連欲徛都徛袂起來；這款虐待犯人的作風，予Coxinja界管下底的弱勢者，有影欲哭無目屎。最近，逐四界聽人風聲謗影，喊講明年四月雨季進前，Coxinja袂進攻Zeelandia城堡；伊會利用這段期間，tshūa領大部分的兵士，上北拍大肚番王佮就近的庄社。
1662年1月25日。進前眾人喊講這段期間，Coxinja會先上北拍大肚番王，事實上無影無跡。大約tsiânn禮拜前，Coxinja方面就大體上tshûan好戰爭需要的人員、武器、設備。透早，雞啼進前，Coxinja的部隊ùi
Zeelandia城堡的四箍輦轉射出大砲，有的大砲tshāi佇旺梨園邊的小山崙仔，有的tshāi踮墓園，有的tshāi蹛魚市場裡；一時，因為四箍圍砲火衝天，kā原底濛濛暗暗的天色，規個照kah紅húann紅húann，遮的情景，阮佇赤崁攏看kah一清二楚；in規工無停轟炸Zeelandia城堡，使致城堡外沿白色的紅毛塗嚴重lut去，城牆內底面規遍紅磚仔予砲火燒烏的痕跡，攏看kah現拄現，有幾落片壁予砲彈pōng
kah大孔細裂。講嘛怪奇，Zeelandia城堡頂懸雖罔猶掛一面大紅旗，毋過，自頭到尾攏無看著ùi遐發射任何砲彈。
兩日後，暗暝欲偎十點，天裡看無幾粒星。Coxinja派一隻舢舨仔船來赤崁，kā我載去伊設踮大員魚市場的軍營。Coxinja提一封Coyett長官落名的批予我，批頂面有頓荷蘭東印度公司的紅色大印，內容是問Coxinja敢願意簽一份公平、誠懇的條約？請用荷蘭文書面回覆。我負責kā原底四角字回覆的批翻譯作荷蘭文，回覆文的重點是講：好，會當來訂約。隔轉工過晝，天色烏陰，Coxinja閣喚我去伊面頭前，目降鬚氅，tsiânn歹聲嗽kā我罵kah無一塊好，伊ná罵手ná指我的面，袂輸欲kā我拆食落腹的款。伊認為我佇彼封覆文裡，的確有使弄Coyett長官，喚伊設法延tshiân時間，thìng好挖戰備溝，裝備武器。我有嘴講kah無瀾，解說規晡久，伊猶原氣phut-phut毋願聽我辯解。黃昏時天，Zeelandia的商務員佮中尉軍官騎馬、舉白旗來到Coxinja軍營外面，紮來Coyett長官願意投降的條約。到遮來，Coxinja才勉強相信我無踮覆文裡作手。
Zeelandia方面寫的條約內容大體上是：Coxinja必須愛無條件kā予in掠去的人質、奴隷放轉來；所有遮的人原本有的財產、物件攏愛還in；所有兵士愛照在來的慣例，武器、裝備袂使離身；逐家作伙坐荷蘭東印度公司的船到Batavia；船隻出航期間所有的需要，嘛著愛應付kah到。Coxinja講，伊無欲佮彼兩位代表討論條約的代誌，若欲講和投降，叫Coyett當面參伊講。條約的內容，除去無允准kā財產、物件紮走以外，偆的伊攏會答應。
翻轉工下晡。Coxinja徛佇西照日的小山崙頂，派人kā我喚來伊面前，氣tshuah-tshuah對我大細聲嚷講，Coyett長官欺騙伊，該當回覆的時間早就超過，到這陣猶無影無跡。伊規個人袂輸著猴仝款，佇我面前雙手拍拳、雙跤出力tsàm塗跤兜、嘴裡buh白波，一直喝講：欲閣拍砲囉。我向伊保證，Coyett長官絕對無欺騙伊的意思。伊隨派兩個部下快馬加鞭去Zeelandia城堡交涉，順續喚五、六個刀斧手，徛佇我尻脊後無界遠的所在。彼陣我咧想，設使Zeelandia城堡裡的人若有啥物無妥當的行動，我的人頭定著落地。落尾，閣經過幾落日，我予Coxinja佮Coyett長官雙方喚來喚去，一直到2月5日，才將條約的內容全然tshiâu好勢。彼暗，我親目看著荷蘭東印度公司，派駐Formosa最後一任長官Coyett，流落暗淡的目屎。
四工後。相連續透幾落日雄狂風了後，風勢有khah恬靜淡薄，海裡風湧平波，是船隻thìng好平安出航的日子。1662年2月9日。時間袂輸予無情的歷史擋恬。毋管按怎，我Meij註定無離開蹛欲20冬的Formosa袂使，被逼愛坐東印度公司的船前往Batavia。因為Zeelandia規個落入Coxinja的手頭，伊親身tshūa領一陣武裝兵士，ùi已經崩敗的烏特勒支碉堡，騎馬向角城的後爿行過，佇遐進入Zeelandia。仝時，受Coxinja界管的各社原住民婦仁人佮囡仔，嘛予伊下底的官兵挨挨陣陣趕入Zeelandia。
我徛佇大員港邊。儘管天色烏陰、咧落sap-sap仔雨，毋過，對予荷蘭東印度公司派來Formosa成作土地測量師欲偎20冬的我來講，雖罔因為Coxinja拍敗荷蘭人、佔領這塊美麗之島，我才著離開ùi少年徛居到中年的第二故鄉，總是，帶著這款oh得講出嘴的心tsiânn離開Formosa，對我來講，減采是一世人無法度放袂記的深窩記智。
──2010.2.13寫佇赤崁米街
2010.4《台文戰線》第18號
[1]
Coxinja：荷蘭文，指鄭成功。
[2] 新港社：台南縣新市鄉舊名。
[3] 蕭壠社：台南縣佳里鎮舊名。
[4] 哆囉嘓社：台南縣東山鄉舊名。
[5] 目加溜灣社：台南縣善化鎮舊名。
[6] 他里霧：雲林縣斗南鎮舊名。
[7] 貓兒干：雲林縣崙背鄉舊名。
[8] 麻崙社：佇現此時屏東縣萬丹鄉。
延伸閱讀陳金順的部落格:春天e霧http://mypaper.pchome.com.tw/19660329/
【音樂】 Theotokion - Eleni Karaindrou
http://www.youtube.com/watch?v=uAnaxuVggPc&feature=related/
文章定位：
