好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 13訂閱站台

公共空間洩水，蹛（tuà，住）樓頂的是上大的嫌疑犯，尤其阮有兩个種樹仔、種花的花壇。

兩年前，掠漏師傅講花壇的防水做了足好，無問題；毋過，既然閣再洩水，就規氣請工程公司來共清清掉。花壇頂頭三欉丈外懸的九芎仔當然也挖掉。開花的時陣，粉紅仔色的九芎花一大片，佇樓跤就看會著，清掉有較可惜。

當初做這兩个花壇，是大工程，空心磚、塗，是人工一擔一擔擔起來的；這陣錢了人無代，用吊車，兩台卡車就解決。

來運塗的時，我拄好無佇厝，幾盆欲擲掉的植物意外猶留咧；心內想：這是in的運命，註定欲閣佇遮生存。

另外，種佇大盆的桂花、樟仔樹、楓仔樹等也留落來。一位厝邊講哪無愛共所有的糞埽（pùn-sò 垃圾）攏清掉，「彼欉苦楝舅（台灣欒樹）焦去矣！」

糞埽？阮毋甘放棄的樹仔佇伊眼中，竟然是糞埽。

彼欉苦楝舅的葉仔焦去，有影敢若是死去矣。我毋甘，一日一日斟酌看，也共沃水；毋過，過真久，攏無看著新穎。

大欉樹仔歹處理，當初興種花的先生這陣也無氣力去管伊。我按算隨在伊去，日後佇樹仔跤掖（iā 撒）花子，種花。

這盆當初種的是紫藤，向望伊旋起去棚頂；結果無成功，卻發一欉苦楝舅出來。伊一年一年抽懸，也照起工一年一年開花。有幾遍風颱，想講頂頭的枝可能會予掃斷，竟然猶伸直直；瘦罔瘦，猶有氣力。

哪知影這陣伊煞焦去！阮小妹講：「伊看著面頭前的三欉九芎仔予人挖掉，驚甲破膽啦。」

這嘛有可能，科學家早就證明植物有感情。

好佳哉，當咧可惜，這日我閣擔頭斟酌看，竟然看著新芽！我足歡喜，共伊講：「你猶活咧！你猶活咧！」

春天矣，我相信，伊會一日一日恢復本來的氣勢。

2025/4/5《人間福報副刋》