好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

我佇一篇台文《教堂vs.動物園》內，寫著「點痣做記號」這句俗語，有讀者共我講in是講「點油做記號」，也共伊佇台語網站看著的說明和一塊教講台語的短片傳予我；遐攏講點油。

按呢啊？毋過，我頭殼內底uì（從）媽媽聽來的是點痣，敢講阮媽媽的俗語「走精」去？

敲電話予大姊，問伊以前媽媽講的是「點」啥物做記號？

伊講：「點油做記號。」

原來是我家己「走精」？

毋過，我臆，大姊佇中部「台語區」生活，伊的用辭有可能予別人影響著；我幾十年無聽著這句話，因為這幾年寫台語文才去想起來，所以我頭殼內的話應當較「純」，才是阮的「母語」。

我心內閣想：點油簡單，可惜一下拭就無去矣。點痣較困難，但是較有力，欲取消也無簡單；雖然，這是kan-n佇喙內講講爾，毋是正經欲去點佗位。

我共我的疑問貼佇面冊和一个Line群組頂頭，結果得著無仝的反應。有人講點痣，有人講點油，有人講點面，也有人講點香。

可見俗語的講法，隨人講，也可能和個人生活的環境有關係，並無一定的規則。

早起，去公園買拜四才會出來賣的包仔，看著『雪里紅』包仔面頂點一个紅點，想講佇遮，就是「點紅做記號」矣。