好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

阿婉共我講，少年的時，氣in翁一个口令一个動作；這陣，足希望伊會當一个口令一个動作！

發生啥代誌？伊講以前in翁敢若傀儡尪仔，愛搝（giú，拉）一下，才會振動；厝內的工課，攏無可能自動鬥跤手。無管洗碗、顧囡仔，攏愛人叫，才不得已出一下仔手。「曷毋是kan-na（只）伊咧上班！」

伊紲落去（suà--lo̍h-khì，接下來）講：「tsit-má（現在），老矣，愈pîn-tuānn（懶），叫嘛無效，規日坐佇客廳看電視。連叫伊食飯都愛予我喝幾若遍，免講叫伊洗碗、收衫。」

  我想著以前上班的時，一位大姊氣怫怫，講in翁親像土地公。

我感覺奇怪，像土地公敢毋是真好？慈眉善目，閣會當求伊，得著伊的保庇。

大姊講：「若按呢就好矣。伊做無半項，kan-na像土地公，恬恬坐咧。」

我講笑：「你袂曉像土地婆按呢，恬恬坐伊邊仔。」

講這个故事予阿婉聽，伊講伊也想欲做土地婆，恬恬坐；毋過，兩个老歲仔敢免食飯、免穿衫？「兩人攏退休矣，時間真冗剩，我做是無計較，是講伊pîn-tuānn嘛愛有一个限度；至少嘛愛我一个口令，伊一个動作。」

我講為著疫情，逐家關佇厝內，心情可能有較鬰卒；兩人規工相對相（看），無冤家就算好矣。

 2021.10.20《聯副》