好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

阿真講伊拄著一个「反形」的醫生。

三年前伊去看過這位骨科醫生，伊醫術好，人親切；啥人知影，這陣，伊和三年前無仝款。

毋知是毋是前一位患者惹著伊，腹肚內的火猶未消；聽阿真講起伊的門診真歹掛，因為相信伊，一個月前就預約；醫生看電腦頂的病歷紀錄，無好聲嗽講：「既然相信我，哪會先去看別的醫生？」阿真共伊講原本家己判斷是神經做怪，才先去看神經外科。阿真共我講：「這是啥物道理？竟然著按呢解說？本來講話就真巴結矣。」

後來，醫生竟然氣怫怫對阿真講：「我當然受氣（生氣），看一个患者，健保局才予我百幾箍；毋過，我猶是憑我的良心看病，袂潦草。……」

哇，真正是「反形」的醫生。有讀過評論，講健保局予醫生的看診費傷少；像精神科，初診病人至少愛看半點鐘，彼屑仔錢無合理，……

不管按怎，做醫生的人對健保局不滿，佇患者面頭前發脾氣，有較奇怪。阿真講：「我並無受氣，醫生也是人，也有情緒。」

著啦，醫生毋是神，只是時辰毋對，伊拄好（恰好）佇醫生心情無好的時陣去。

在我的經驗，醫生攏真好。

今年年頭，因為心臟亂跳去看心臟科醫生。第一遍去，我等足久，大約仔估計，伊平均一點鐘看七、八个患者；輪著我的時，就知影伊頂真的程度。伊問甲足工夫，安排我做各種檢查，照電光、抽血、心電圖、安24小時心臟追蹤儀器，……

第二遍回診，伊講我的症頭無嚴重，毋過，猶是叫我著食藥仔，講伊開劑量真輕的；然後，叫我去食晝了後，轉來做超音波。我毋知伊有歇睏、食晝無，下晡三點，才輪著我。醫生本人替我做，護理師佇邊仔看，講「媠」（我的心臟）；醫生也講袂bái（差）。人遮爾（tsiah-nī，這麼）親切，閣予我信心，猶未食藥仔就感覺好真濟矣。

每個月，我著陪開過刀的頭家去病院回診，彼位外科醫生也真熱情。逐遍見著阮，一定喙笑面笑，講：「真久無見矣。」我講著啊，一個月矣；心內想這敢有算久？才一個月，就姑不將需要來和你「約會」啊。

伊講話溫柔，一遍一遍講：「辛苦喔」、「多謝」；這款話，敢毋是阮較需要講？好笑的是，叫患者上診療床，伊慣勢用華語講：『麻煩您幫我躺上去。』到底是啥人愛倒上床？有時後生也去，阮兩人就相看笑起來。

閣有一點足好，伊有面冊，教醫學常識。我有問題，就佇面冊私訊請教伊；除了伊拄好（恰好）佇手術房開刀，逐擺攏會當佇十分鐘內得到回音。大細事攏會當問伊，感覺伊毋但是我的面友，也是阮的家庭醫生。

以前的人時行講「先生緣，主人福」，意思是，拄著有緣的醫生，病就較快好。毋過，這个緣份，可能猶是著靠雙方的配合和家己的判斷；有的醫生，若對伊無信心，莫閣去揣（tshuē，找）就好。

2021/10/29《人間福報》