好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 11訂閱站台

郵差來揤電鈴，講有我的掛號批；我應「好」，隨趕緊抹胭脂（口紅），穿外套，戴目鏡，掛手錶，穿鞋，然後，提布包uì（從）四樓大步行落去。毋是收批著梳裝打扮，是我拄好（tú-hó，恰巧）欲出門啦。

開樓跤大門，共郵差會失禮，「真歹勢，予你等遐（hiah，那麼）久。」

按呢講，家己笑起來，想著幾十年前的代誌。

彼年，二九暝圍爐，一家人鬥陣食飯；大官（公公）和五个囝啉酒講話，真鬧熱。四个小叔猶未結婚，在座的女性kan-na（只）大家（婆婆）和我－－毋願講查某人，我才二十外歲啊。我猶未有機會敬酒，大家捀（phâng，端）酒杯招我，「咱也來啉一下。」

這个時陣，我身軀邊一歲外的囡仔直直欲徛（khiā，站）起來提桌頂的物件，我共伊安搭（安撫）好勢，才捀杯仔起來。大家講，「予我－－」我接落去講，「予你等遐久。」

大家笑笑仔罵，「予我老康健啦，啥物予我等遐久！」（老康健？彼年，伊才五十二歲呢。）

後來轉去員林，我講起這个笑話，阮阿姨講，「無彩你是攑筆尾的，恁大家起一个頭予你綴（tuè，跟）咧講好話，竟然袂曉。」阮媽媽無講啥，毋過，有一點仔憂愁。伊本來就講我講話hân-bān（笨拙），有時閣真白目，對我這个嫁去大家庭做人大新婦（媳婦）的查某囝，可能加減袂放心。

好佳哉，阮大家袂蹺攲（khiau-khi，挑剔），也袂佇新婦面前激（裝）大家的氣口。教我煮菜的時，伊講，「有較汫（tsiánn，淡），閣下兩粒仔鹽落去。」我想一時仔，問，「兩粒是偌濟？」伊愛笑，「哪會遮爾（tsiah-nī，這麼）條直。」伊呵咾家己的孫媠；紲落去（suà--lo̍h-khì ，接下來）講，「in老爸細漢的時閣較媠。」我講，「喔，恁囝比阮囝較媠啦！」伊笑出來，講，「這个氣口，敢若咧共人蹧躂（挖苦）。」

有一回，阮大家新婦和大姑、小姑四个人參加紐、澳旅行團；第一日，真濟人佇車內睏足落眠，根本無聽著導遊咧講啥。導遊講毋捌tshuā（帶）過遮爾好睏的團。我共比我較好睏的大家講，「你的功勞上大。」佇紐西蘭皇后鎮的時，我共伊講這个所在風景足媠，咱莫轉去台灣；伊講，「好，佇遮應當袂歹過日。」一路我慣勢烏白講，伊攏真捧場，無熟似的團友掠做我是伊的查某囝。

轉來台灣前，旅行團佇峇里島停留三日，第一工暗頭仔，導遊tshuā阮坐規點鐘的車去採購咖哩、胡椒粉等芳料；然後，行一條細細長長的路，才予忝（thiám，累）閣枵的一陣人食一頓人人嫌的飯。轉去旅舍了後，除了小姑講行遐爾久袂使食無飽、無去枵著以外，阮三人佇海邊的攤仔買麭（pháng，麵包）和牛奶來食。我一時狡怪（頑皮），學小姑氣怫怫的表情和大姑當時對領隊講的敢若囡仔激氣的話，予in笑甲流目油。第二工起床，浴間竟然無水通洗面。阮蹛（tuà，住）的是一棟一棟獨立的度假厝，我想欲知影小姑和大家彼棟有水無，敲電話過去，猶未開喙，卻聽著大家講thank you。講甲真紲拍（suà-phah，流利），閣有元氣。知影in也無水，我講，「連水都無，你也咧thank you！」伊講叫是morning call。

日後，序細講阿媽綴會著時代，旅行過足濟國家，也會曉講英語，伊就笑咍咍。

阮tshuā伊和阮媽媽去日本自助旅行彼回，佇大阪機場，我就講伊較少年，閣去過幾若擺日本，愛加減照顧阮媽媽；七十五歲的正經就不時牽八十一歲的行，一路參觀東大寺、金閣寺。佇後面看兩个身材差不多的背影，是彼遍旅行誠溫暖的風景。

遮爾開明、趣味的大家好做伙，做新婦的袂曉講好話無啥要緊。不過，彼个二九暝漏氣了後，我以後攏會自動敬酒，祝伊健康－－毋是「老」康健；閣一定加一句，「也祝媽媽青春美麗」。聽我按呢講，伊就笑笑仔罵，「幾歲矣，閣欲青春！」

無論按怎講，總是比「予你等遐久」較好。

2020.11月號《文訊》