好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

早起佇公園看著一个賣果子的發財仔車，有木瓜和芭蕉。

我罕得買芭蕉，看彼兩堆芭蕉，媠媠仔，想講來買一枇。

芭蕉一堆較熟，一堆較好看頭。我手比彼堆較熟的，問，「這是毋是隨會使食矣？」

彼个查埔人應，「袂使。」

袂使？愛囥咧隱？

我問，「愛過幾日才會食得？」

「納錢就隨會食得。」

啊？透早就拄著這款五仁的人。

（我佇一篇文章內底，講過爸母的話攏存佇頭殼底的資料庫，時機拄好，就會走出來發聲；幾十年毋捌聽著的五仁這个詞，就是雄雄uì資料庫走出來的。）

        ＊

  有一遍也拄著這款笑詼的人。

彼工，幾个朋友約好去台北世貿看＜台灣藝術博覽會＞，我坐的公車到松壽路車站的時，離相約的十點猶有五分鐘，心內為家己時間節甲遮爾準歡喜；毋過，世貿三館的門口哪會冷冷清清，連一个廣告布條仔都無？

敢會我行毋著所在？幾個月前的藝術博覽會明明就是佇遮啊。

拍電話去問，朋友講佇一館，信義路啦！

好佳哉，兩館才離幾百公尺爾爾。我知影一館大概的方位，毋過恐驚行冤枉路，了時間，行到一个路口的時，看著穿黃kah-á的交警（義交？），就請教伊按怎行？

「你欲去世貿一館，一个人？」

「一个人抑是真濟人有啥無仝款？」我憢疑。

「有密碼。一个人愛講『芝麻開門』才會使uì遮行過。」

啊？這是啥交通規則！我猶未反應，他手比遠遠的豆沙色大樓，講，「遐就是一館；毋是懸的彼棟，是頭前矮的彼棟。你入去的時愛講『啾咪，愛你唷。』」

這閣是啥物密碼？早時十點，人和車來來去去，是日常的台北，毋是魔幻世界啊。

看著伊狡怪的笑容，我才笑起來；認真共伊講，「好，我會照你講的做。」

看起來無啥趣味的工課，竟然予伊做甲遮爾心適，伊實在是幸福的人！

2020.7《海翁台語文學雜誌月刋》