好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

   

今仔日學著一句台灣俗語：賣囝無囝名，賣田無田岸通行。

陳太太講in（他們）做田的老爸足儉，內衫破甲大空細空，猶毋甘做桌布，免講擲掉。「破病食藥仔，也一定愛食予完，無管是毋是人已經好矣；儉慣勢，啥物件攏袂使拍損。」

毋過，這个做田人有做田人的原則；粒積一筆錢就去買田，買園。想袂到六十外歲就佇眠夢中過身，身軀猶是穿一領破內衫；一世人攏無享受著。

陳太太講老爸過身後分財產，in三个查某囝攏無份；老母講小漢的時分予阿姨做囝的屘小弟應當分淡薄仔，「阮大嫂就講，賣囝無囝名，賣田無田岸通行。」

意思是囝入別人的戶口就是別人的，無權利轉來分財產；田賣予人，田岸路當然也是別人的矣，毋是你隨便會當踏跤到的所在。

這句話鬥句（押韻），聽起來誠有力；尤其佇分財產的時陣自新婦喙內講出來。

結果三个兄弟講好佗一塊予大的，佗一塊予老二，佗一塊予老三。「啥人知影睏一醒起來，大兄講伊彼塊無好，伊是大囝，做田的時間較長，照講愛分較好、較濟。」

結果閣再冤（吵）兩遍，才撨好勢。「阮三兄是做生理（生意）的，無愛計較；伊分著的田園離庄頭較近，但是土質較差；稻仔熟，菜會當收成，庄內的雞仔、鴨仔閣會規大陣去食。」

我講彼位大嫂應當真強勢，陳太太講確實，伊也真拍拚，日時做穡，暗時做衫，趁的錢閣去買地。可惜，大兄竟然共人做保，後來田園攏烏有去，kan-na（只）賰一間厝；厝是登記囝的名。

三兄的呢？陳太太講經過二三十年，彼塊散田變做建地，三兄共伊一塊一塊分割，賣予人起厝。「價數當然變真好；以前土地用分算，這陣用坪算。」

莫怪人講風水輪流轉，田地和人的命運攏歹講啊。

2019.8.7《自由時報》副刋