好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

無意中，看著一个專門綴（tuè，跟）咧翕（拍）去日本旅行的外國人的電視節目。

電視台人員問一對西洋人in（他們）哪會來日本？In講兩日前才結婚，來蜜月旅行；in無愛去都市，也無愛坐車、純然靠兩肢跤uì（從）這个庄行到另外一个庄。

這款情形的旅客可能較稀罕，電視台團隊足歡喜，直直拜託in答應予in翕。新婚翁某起頭講，「阮是咧蜜月旅行呢！」毋過，後來同意予in綴一日。

兩个人開始行路，雖然揹佇尻脊骿（kha-tsiah-phiann，背）的行李真大件，竟然行真緊（快）。山路安靜，樹仔青翠，in行著真輕鬆；行一點鐘兩點鐘三點鐘四點鐘，攏免歇喘。kan-na（只）一遍行入去便利商店買水；買好隨出來，繼續大步行。電視台的人逐（jiok，追 ）甲怦怦喘，問in是啥職業？女子講伊是長走（跑）選手，翁是短走選手。

看到遮（tsiah，這兒），我笑起來。想著一句台灣俗語：袂曉剃頭，拄（tú，遇見）著鬍鬚（絡腮鬍）。

繼續看落去，好佳哉，日頭落山矣，兩翁某行到in佇網路訂好的民宿；電視人員才有法度翕著in入門，卸行李，坐佇榻榻米頂頭食日本料理、啉清酒的鏡頭，也會當共攝影機囥（khǹg，放）落來，予兩肢牚腿（thènn-thuí）的跤好好仔休息。

閣較好佳哉的是，明仔載就免綴矣。

2019.3.10《聯合報》副刋