其實自那天起，我已經沒有心情、心機寫日記。本來開心的亦變得唔開心，亦因為這樣，不悅的心情由零五帶到零六...我真的不想這樣，可是......
12.12.05,星期一. "家姐生日快樂"
今天是家姐生日呀!今年只是send了個msg祝賀她，自從我們少了出來以後，就已經沒有了為各人慶祝的傳統了。其實我好掛注阿思佢地，好想念從前一起的日子，但現在......
16.12.05,星期五. "死期的奇蹟，但未見曙光..."
死期到了、死期到了，剛好趕得起份功課，本想親身過海交比Miss的，但我打了個電話給Miss，她說不用親身交，即日寄遲一兩日收到無所謂。我一聽到她這樣說便即是感謝她，一來唔洗專登搭車過海，二來難得的一個唔洗做看更的禮拜五晚上不用白白用於交功課。於是收工就同o左阿Mon阿Meg去食o野傾計。
17.12.05,星期六. "邵曉玲生日快樂"
是日長週,開會日，亦是邵曉玲的生日，所以早上通了一個電話給她，向她道賀一番。開職員真的沒有意思，如果可以唔洗開幾好呢!但這是沒可能，咪當罰抄囉!
18.12.05,星期日. "做冬"
由於冬至正日係星期四平日，所以媽媽揀了今天做節，正所謂冬大過年，一家人自然聚首一堂，所以舅父如常的帶婆婆來我家做節，就在他帶婆婆來之前，他約婆婆去茶樓飲茶，但點知婆婆一不小心於茶樓門口跌親，跌損o左個下巴同撞瘀o左隻右眼，但是她堅持唔肯去醫院，舅父只好為她做簡單處理後就帶她來我家。老人家就好似小朋友咁，過了一夜她終於肯跟媽咪去睇醫生，幸好醫生都話她無咩事o者。由於今晚天氣冷，尤其我家，婆婆在我家過夜我們怕她冷到，所以一家人做完冬就坐車落沙田買個暖爐回家，以免晚上冷到她呢!這個暖爐是我們住在穗禾苑廿多年來首次買的。
21.12.05,星期三. "如果．愛"
今日收工約了Sharon和Sally去睇"如果．愛"，但點知臨收工上頭要我們交o野，結果我成六點先收得工，趕到我隻o野咁，緊緊七點前去到朗豪坊，沒有遲入場呢!睇完戲，三個人去了雅蘭的王家沙食飯，但這店的質素真的不及沙田店，唔得唔得。
講番套戲，之前Pinky話幾好睇，我睇完都覺OK，愛情就是這樣的了...不過可能今日有點倦，一路睇一路釣了幾o下魚呢!
22.12.05,星期四. "聖誕禮物"
聖誕節快到了，節目也安排了，這個假期由24號至29號都有節目呢!好似好忙碌哦~
聖誕節，自然少不了聖誕禮物，今年只有中心和同小燊佢地有玩交換禮物外，就無其他了，所以我只買了三份(其中一份是多木的)。我一如以往的往西田揀，但今年在那裡沒有看上的，於是乎轉去City’super的Log-On，結果看到不少心水禮物，但礙於budget有限，所以沒有買得太貴，不過我揀的全都實用，男或女抽中都可以。
24.12.05,星期六. "平安夜的聖誕大餐"
星期六，短週，湊巧遇上平安夜(日)不用上班，所以忽發奇想弄一次聖誕大餐招呼朋友，於是相約了Jordi兩公婆、Sharon到我家食聖誕餐。我一朝早五點幾就起身，不過唔係一早煮o野，而係陪爸媽落樓搭車，是關他倆要去廣西旅行呢!
送完爸媽搭車，返上樓唔小心弄醒了Sharon，本以為她一早起身去陪嘉藍擇日，於是send個msg同佢吹水，但點知原來她兩的約會取消了，我的msg變成弄醒了她的鬧鐘，結果...更係比人罵啦!由於時間實在太早啦，比人罵完繼續睡，睡至十點幾鐘起身開始做o野，一做做到成兩點，不過我並不是弄菜，而係執屋搞清潔，還有準備聖誕餐的餐具等等，都咪話唔辛苦。
一切基本的完成了，於是就call Sharon出九龍塘的Taste，買仍未買的煙火雞、沙津用的菜、芝士、汁粉、調味粉等等，其實有o的o野昨晚在西田已經買定的了，但還是買唔晒，就連Taste也買唔晒，所以回到穗禾苑仍要買。待買齊o野返到屋企，同Sharon食小小o野都已經成五點了，是時候開工啦!洗呀切呀~搞呀撈呀~我在廚房Sharon在廳，先完成沙津，然後撈意粉、灼菜、煲湯，跟注開始焗薯，待Jordi兩個和他的好友阿年兩個到埋，就開始煎牛扒上碟，我掛注o的湯、意粉、牛扒和焗薯，竟忘記了早最的沙津，真搞笑。我們今晚都玩得幾盡o架，食o既時候熄埋燈點埋腊燭，還播Let’s Folk again內經典歌曲相伴，十分有氣氛呢!!
我今次是第一次親手下廚煮成個晚餐比朋友食，平時都只是玩玩o下煮比屋企人食，又或者到朋友屋企幫手煮o下就有，所以真的又點壓力，不過好彩幾位朋友都十分比面，我弄成怎樣難食都沒有什麼，真的多謝大家的厚愛，辛苦你們了。食完主菜，我們今晚的第二個主角出場了--朱古力火鍋，Sally先幫手執o野洗碗，Sharon就幫手切生果，而我就弄朱古力(好在有Sharon提唔好用火熱注o的水咋)，三兩下就弄好自家製朱古力火鍋。起初因為朱古力浠效果不是太好，但一路食到後期o的朱古力變濃了，效果就好正和似在瑞士餐廳的效果，食埋朱古力火鍋，時間到不早了，洗埋晒o的碗碟都差不多是十一點了，大家議決出尖沙咀，就因為已經這麼晚，結果我們就向新城市的巴士總站迎接聖誕節。
我們十二點幾出到尖沙咀，街上仍很多人，但已經無乜燈飾睇了，所以我們瞭一瞭過尖東海旁就行返去北京道M記坐低飲杯o野吹o下水，差不多兩點才閃人，我送埋Sharon返屋然後才歸家，都已經講緊係零晨四點鐘了。
其實今晚的聖誕餐，我最想有機會弄給妳吃，試一試自家製朱古力火鍋似唔似我們在瑞士餐廳吃的......
今晚的餐單:
法式煙火雞沙津
忌廉蘑菇湯
香菇茄汁腸仔意粉
車打芝士焗煙火雞薯仔片
紅酒牛扒伴小椰菜
七彩朱古力火鍋
澳洲紅酒
25.12.05,星期日. "聖誕邊爐"
昨晚咁夜訓，今日自然大昏迷，訓到成點幾兩點先起身，搞東搞西到傍晚，梳洗過後就出街，因今晚約了阿婉、Pinky和陳生去打邊爐，我們本想去麗都的，但那裡要9點後先有得打，所以我們轉去皇都，一打就打到成十一點，由於那時個個都倦了，所以今年我們沒有出尖沙咀啦。開心的時間總是過得快，同要好的朋友渡過了一個簡單的聖誕。
26.12.05,星期一. "生日快樂"
蕉蕉，生日快樂呀!雖然不能夠為妳慶祝，但我對妳的祝福是從心而發的......
今日約了Jordi兩隻o野、阿Mei兩公婆、Sharon和她的二姐二姐夫，入大欖涌BBQ，我都係第一次去那處燒咋。我們下晝先入去，由日頭燒到天黑，燒完還未夠喉，坐番車出旺角繼續下場卡啦OK，但結果發起人Sharon同佢二姐二姐夫兩點幾鐘就走人，剩番我們幾隻餘黨就唱到四點先捨得走，玩到癲晒!
其實今日有唔開心，原因係......我只能放進盒子裡，不可寫在夢星雲。
27.12.05,星期二. "聚舊"
昨晚...應該講今朝五點先o岩，我五點先訓，恨不得訓到夜晚才起身，但由於今日係約o左小燊佢地，所以訓到中午便起身，同屋企人飲過茶就去沙田會合小燊同大舊，按我們原定計劃，去沙田的文化博物館睇"乾屍"。我先前都頭痛搵邊個有興趣同我去睇呢，點知今次隻死o野主動話去睇，我更係第一時間應承兼叫好啦!是關我十分喜歡新疆古絲路一帶的遺跡，尤其最愛"樓蘭"和"尼雅"，而今次展出的，正是這一帶所出土的文物。不過我最想睇的唔係那三具主角古屍，而係一塊布，一塊經歷千多年仍保存良好的織錦。我之前在書裡面見過有一些出土時幾乎和新的沒有分別，這已經使我驚嘆，再加上當時的人手工了得，能在布上織出吉祥語句，這便是吸引我和使我喜歡它的地方，結果今次新疆方面真的帶了其中一塊保存得較好兼且體積較大，布上織了:"王侯合昏(婚)，千秋萬代宜子孫"的織錦來，真的睇到我唔捨得走，甚至乎想學人做大盜偷走它呢!除此之外，還可以親眼看到佉盧文木簡和不少在書中看過的文物，這十蚊真的抵呀!
睇完我的愛"布"，先回我家取禮物，然後三條麻甩仔就坐車出旺角逛街等邵曉玲。由於個死婆遲遲都未到，所以我提議去買衫，是關我每次約親小燊出o黎，一定會搵佢陪我買，因為他的眼光好、懂打扮，又知我心水，所以今次一樣唔放過他，結果我收獲真的甚豐，用o左二百五蚊就買了三件衫加兩件外套，正~新年有新衫著啦!買完衫，邵曉玲也剛剛到了，於是我們就去搵o野食，本來想上雅蘭滔香打邊爐的，但由於勁多人等位，所以我們轉去同在雅蘭樓下的地窖食店，那裡自從由美食廣場變為幾間食店後都無幫襯過，所以都唔知下面有乜食。起初我們驚佢貴，但去到見佢個水牌寫注9點後所有店舖八折，於是走去看看，當去到下面，門口o的"姿客"小姐即刻話隨便入一間都可叫晒三間店舖的食物，我們見有齊滬、日、泰三種美食，一於試o下啦，所以我們入了一間食日本的，但結果主力都是點了日本菜，然後加了一碟"饅頭"咁大把。我們夜校好友聚頭，一定唔少得交換禮物遊戲(次次出親都玩，無節日都玩，搞笑)，今次都唔例外，聖誕節嘛!結果我抽到邵曉玲的小豬廁紙盒，好用但唔知可以放邊。難得聚頭，當然要傾計，傾到人家舖頭關門我們才捨得走呢!開心的時間真的過得好快，又要講bye bye了，不過我們好快又見，因為我們下個月15號約去大嶼山呢!
28.12.05,星期三. "通宵通電"
今天仍然是我的假期，我覺得自己今日攞假攞得幾o岩，因連續玩了咁多日，係時候比自己真正休息o下。所以今天安排自己訓到十點幾十一點起身，梳洗過後就一枝公過沙角，去王澤森取那些防中風書仔和遊戲光碟，跟注就搵o野食，我本想食大掛檔的粥和油炸鬼的，但行了沙角、乙明和博康都無，結果還是回沙角的大排檔食我最愛的經典"午餐"，亦即係各大小排檔茶餐廳的沙嗲牛意、火腿庵列加牛油方飽，這也是我的最愛呢!加埋一杯大排檔奶茶，正呀!一個人食係就雖然悶D，但一個人嘆茶又是另一番風味(有點麻甩就真)。
食完o野，在濛濛細雨下一個人經瀝源橋徒步過新城市，幾"浪漫"呀~~然之後去搵阿Yen吹陣水，跟注落機舖打我無打好多個月的足球Game(99.1版)，哈哈，我果然寶刀未老，又有金球啦!打完機繼續四圍逛，逛到夜就返歸食飯。
今晚零晨四點有波踼，本話早點睡然後起身睇波，但十二點鐘開始同Sharon傾電話，一傾就傾o左四個鐘，勁呀!(其實是Sharon陪我等睇波呢，真的辛苦她了)準時四點收線，跟注睇波，睇到五點九先上床睡一睡，然後就返工。
29.12.05,星期四. "陰霾不散"
開工了，但因為全晚無訓和幾日以來的心情，成個人都無乜精神和心機，那陰霾始終不散......
30.12.05,星期五.
今日的心情依然沒變，想擺脫，但真的不能。
31.12.05,星期六. "一年的終結"
是日長週，不是公眾假期即係要返工啦!不過大家似乎不在狀態，個個都等放假。
今年的除夕很特別，特別在沒有活動，原本話約入阿青到，但由於人數太少而取消，亦因為早前沒有答允參與瑩瑩的活動，結果今年什麼的活動也沒有搞、沒有參與。於是我就借o左人o地阿媽陪我，去了行街食飯打邊爐，然後連倒數都沒有兼掉下人家阿媽趕回屋企睇波，結果在家裡的廁所橫跨0506年。
可能沒有一班朋友一起倒數，都唔覺舊一年過去，新一年來臨，但這一年的確發生了一些事，開心與唔開心...唔開心似乎多一點，而不悅的心情還由05帶過06年呢!一年了，咁就一年了，時間真的很快很快......
文章定位：
26.7.08 "出發啦!出發啦!準備出發啦!, (chausze)