陽光．彩虹．「夢」星雲 夢．星．雲 不應分離 是時候讓他們重聚 「夢星雲」的世界裡應該充滿愛與理想 讓愛的和煦璀璨入夢 讓理想的勁擦亮星星 讓澄明的心洗滌白雲 不單要凝聚，還要有陽光與彩虹

103愛的鼓勵 0訂閱站台

10.11.05,星期四. "趕工"

今日收工約了瑩瑩去"Relaxing"食Tea，然後去大眾買了周杰倫隻新碟，等轉做MP3再send番比佢。
返到屋企食完飯，上網搵完資料，阿旺都未睇完就打電話比Sharon，傾佢份功課，結果傾咗差不多個幾鐘，希望幫到佢啦!如果順利幫到佢，星期六佢就可以一齊去BBQ啦!同佢傾完功課，就到自己開工啦!開工做會議紀錄，11點幾開始做，做到差不多成3點終於頂唔注，要去交交豬了，惟有明天繼續!可憐我阿妹還在電腦面前趕工打公司的單，我都唔知佢幾點訓了!我個妹個阿頭簡直無良同唔係人呀!

11.11.05,星期五. "玫瑰圍牆"

好彩昨晚做了一半，今日用一個上晝就做起份會議紀錄比老細，可以安安樂樂!
由於昨晚做到咁夜，晚上已經無乜能量再工作，所以當看更時看了一套德語電影"玫瑰圍牆"，故事講述二次大戰時，兩個"德猶通婚"的家庭，一位德裔太太苦等她關在獄中的猶太丈夫，因為她沒有放棄及經過多次的努力，結果給她與丈夫團聚﹔但另一個家庭，德裔的丈夫承受不起壓力，與猶太裔的太太離婚，結果女的失去了身份被送去了集中營一去不返，剩下可憐的女兒與前述的德裔女子相依地等待，到最後她還是等不到她的母親......整套戲沒有任何戰爭殺戮場面，卻強烈帶出了戰爭的可怕及納粹迫害猶太人的事蹟，真是一套不錯的電影!
睇完戲，做多少少嘢先收工走人。

12.11.05,星期六. "Charlie and the Chocolate Factory"

星期六，短週，一早起身過葵涌搵婆婆飲茶，點知過到去婆婆屋企摸了門釘，結果變咗我同爸媽一齊飲。
原本今日約了蕉蕉佢地BBQ，但點知個死婆(Sally)病入膏肓，結果取消了!於是下午呆呆的，飲完茶去街市陪媽買餸，然後回家睇"Charlie and the Chocolate Factory"，但剛睇了半個鐘，Sharon打電話o黎搵我"陪佢返屋企"，其實即係向佢搭車返家的路上同佢傾電話，結果傾到我電話都無電!!
傾完電話食過飯，繼續睇我的"Charlie and the Chocolate Factory"，這套戲可說是我小時候的閱讀啟蒙，正確講應該是她的小說版，因這套戲本是由兒童暢銷小說改編，當年我睇的是中文版，譯名<<查理與巧克力工廠>>，另有下集為<<查理與玻璃大升降機>>。我對閱讀有興趣，都可說是其中拜此書所賜，當然，還有幾本書都是我的啟蒙。
講番套戲，我細佬早前入戲院睇的，但他睇完出o黎話低B唔好睇!但我睇完沒有這感覺，相反覺得好好睇!話說回頭這是寫給小朋友的故事，成年人睇可能覺得低B都唔奇，但她故事的教育意味深重，教小朋友不應貪心、好勝、野蠻等等道理，還有提倡"家庭"的觀念...這一切一切，對成書至今的社會都合用，因為現代人對"家"的觀念已淡化，大多小朋友都在給家長寵壞中成長，如果社會長此下去，沒有一些如此的電影之類的東西去提醒大眾，社會問題和人與人之間的關係只會變得更淡。
睇完"查理"，睇多一集"鄭和"才睡。

13.11.05,星期日 "摯愛"

今早又係飲茶，飲完一個人逛沙田，買了"摯愛"和"北極快車"兩片。晚上一家人就同媽媽預早一日慶祝生日，去了新城市新開的"花月星"越南餐廳，不過這兒價錢唔係平，但食物就一般和沒有什麼特別，要去第二次真的想想先。
食完飯回家睇"摯愛"，這是"長頸鹿--薛凱琪"第二套做主角的一電影(應該係掛)，又係文藝片，不過今次比上一套"早熟"文藝好多，爸媽睇咗一陣就入房訓，唔似睇早熟咁睇全場，所以最後得番我同細老睇到尾。不過這戲我覺得真係好老土，我睇到後尾猛咁叫"慘"，乜個女主角同小妹妹咁慘o架!就算最後有三百萬又點?但其實，在現實生活裡，有戲中的人物與故事也不為奇。

14.11.05,星期一. "媽媽生日快樂"

今午教訓了班老人家一頓，好耐無試過了，不過她們實在太勞氣啦!唔去話佢地唔得!
今日證實部新手機個聽筒位置壞了，只有免提和揚聲可用，所以收工去了123換機，但點知無貨，要等有貨先，幸好免提可以用注先，那惟有等啦!
去完123，同爸媽上了酒家食飯，因為佢地去咗買嘢無煮飯，那我預訂了的蛋糕只好待食完飯才去取。由於妹要加班同細佬同同事有應酬，所以我這蛋糕待他們人齊回家才同媽咪食，但妹妹12點前仍未回家，所以我們等到11點幾先同媽咪唱生日歌切蛋糕呢!
媽媽，生日快樂!!

附圖:送給媽媽的生日電糕