尋晚去美麗華商場地庫，Todai 食日式連夜晚。6 點未到已經開始執定嘢，磨吓磨吓，夠鐘即刻執嘢走，因為人數問題，成班男同事（除咗老頂）全部走晒去打的。而女同事因為有 5 個人本來都諗住打的。老頂就話：『我架車可以上多 4 個人架。』咁我同 Wing 想叫我阿姐、細嗰個同埋新同事（以下簡稱三寶）上坐啦。但係細嗰個竟然講一句我好耐冇喺香港聽過既說話：『我唔搭得車，我會暈車浪呀﹗』吓﹗咁即係變咗我同 Wing 坐老頂架車喇﹗我仲要坐助手席添呀﹗陰公﹗上到車，佢仲狂播刀朗既 CD，但係首首歌都差唔多咁樣，我以為佢重覆播同一首添。我哋係去美麗華商場度食嘢，但係佢竟然將架車泊咗去中間度，我冇出聲呀，我以為呢度會平 D。搞到我哋行咗好耐，佢亦都知道自己泊錯車，但係太遲喇﹗傻佬，抵你死﹗
嗰度好多嘢食，應該話，有好多好嘢食，原來唔只日式，入面仲有中式、西式、泰式，總之咩都有啦﹗其中一個芝士煎龍蝦仔，真係好好食，但係要等好耐，同埋好搶手，咋一聲出爐，又咋一聲冇晒。我總共食咗一隻（輪咗兩次），因為太漏，唔敢食第三隻喇。壽司、刺身都好新鮮，甜品又多，有梳乎哩添，不過我唔好甜嘢，所以食咗兩啖都頂唔順。佢哋就話好香，好好食。
食完之後，我哋五個後生因為太飽，我提議行落去旺角搭車，以前行慣咗，上完堂就行去信和睇碟嘛，對於我嚟講濕濕碎。佢哋可能未試過咁行，開初都牙痛咁既聲，不過行下講下笑下就話咁快就到喇。諗諗下我星期六要去飲都未買 Boot，於是尋日已經拉住 Wing 陪我買咗喇﹗衫、裙、Boot 唔駛 $250 就搞掂﹗幾 Cheap! 哈哈﹗早抖﹗
文章定位：
