我可以上番網喇﹗嗚…冇事喇﹗原來要裝番 Internet Security 至得，多謝阿婆之前俾左隻碟我咋﹗唔駛麻煩 Wing Wing 舅父喇﹗我要狂寫至得﹗
呢日，去左原宿行街街﹗一早我走左去代代木公園，有好多人已經係度練習，有花式單車啦、跳舞啦、仲有見到小朋友玩單輪單車添呀﹗我諗我到時去日本學跳舞時，逢假日都可能會好似佢地咁樣走出黎練習。嘻嘻﹗呢日既早餐就係燒墨魚丸，真係好好食，又好多粒，可以兩餐夾埋一餐添﹗
到中午時，見到好多人擺檔，原來今日星期六係有跳蚤市場呀﹗於是我好似巡場咁，逐個逐個咁睇，不過 D 野真係好污糟都拎出黎賣喎﹗以為可以睇到正野添，有少少失望啦﹗行過 D ，見到有人表演喇﹗走埋去八下先。原來係兩個大阪0黎既後生仔（22 &19歲）輪流0係度彈結他唱歌，周圍都好多人圍住佢地，我諗番起 w-inds. 出道前都係0係度做街頭表演，好得意呀﹗如果香港人0係香港做街頭表演淨係會俾人望住晒。但日本真係好互動，就算第一次聽都會跟住一齊打拍子，一齊跳，好好玩。由於0個日好凍，所以到22歲0個個表演時，19歲0個個（XX 善太郎）每人俾左杯熱飲，睇下原來係溝左日本酒既米粥。好難食﹗但係因為太凍，酒可以暖身嘛，唔食唔得。我後來仲睇到散場，佢地最後仲扮「柚子」（大阪出身既兩個男子超人氣組合）唱歌引我地笑。之後同善太郎影相同簽名留念。陸續都有好多人表演，其中有一個阿叔戴住耳機0係度嗌歌，嘈喧巴閉，搞到冇人理佢﹗哈哈﹗亦都睇到有四個男仔跳我想學既 Hip Hop 舞。但係睇左一陣就走喇﹗因為我隻腳實在唔可以再企喇﹗
臨走時我仲去左 Johnny's Shop，比大阪真係多好多人。可能今日係假期卦﹗仲去左有兩間賣明星相既舖頭見識下添﹗（Sorry Elmo! 我見到有好多 Shun chan 既野，但係一件都冇買，不過都有好多 Exile 既相，人氣都拍得住 D 後生仔﹗）
原宿其實都未行晒，今日0係代代木公園留得太耐喇﹗搵日再行過至得﹗
文章定位：
