星期六朝早，又要返工，都唔知做咗 D 咩嘢就放工喇﹗跟住就係一年一度既公司大旅行《去澳門﹗》(噓…)-_-"
今次成員有：老黃(財神爺)、大 C 同佢個朋友大 M（唔係講個額頭，放心﹗）、Wing 同佢個朋友阿恩、Ken 同佢個朋友 Ed（我到而家仲未搞清楚佢叫 Edmond?Edwin? 定係 Edward?）加埋我一共 8 個人。點解係咁既陣容我唔解釋喇。總之我就連放假都要對住個頂爺啦﹗(頂佢個肺嗰個頂呀)
2:30 上船出發，因為太趕冇時間食嘢，好彩阿恩買咗個套餐，我同大 C 食薯條頂肚咋﹗Ken 靜靜雞同我講原來阿 Ed 佢係日文二級架﹗呵呵﹗當堂好似見到個靚仔咁兩眼發青光﹗套佢料原來佢係今年二級既監考員，即係又會見到佢啦﹗佢都斷斷續續讀咗 9 年既日文，又喺日本公司返工…唔講佢喇﹗坐坐下船時，見到老頂好辛苦咁，原來佢暈船浪﹗真係財多身子弱﹗睇佢個款肥屍大隻又唔似﹗卒之，一個鐘頭就到咗喇﹗
我哋今次住既係叫做『金龍酒店』，4 星級，地方都唔錯，不過下面有夜總會廣告牌，成個女人唔著衫扒咗喺度，真係該燴。因為係 3 男 5 女，我就同大 C、大 M 一間房，老頂就自己一個喇﹗去到酒店接近 5 點，老頂就想去賭場玩玩，變咗成班後生可以無皇管去觀光塔度玩。原來都有 D 日本人去架，可能佢哋都係嚟睇賽車啦﹗咁我同阿 Ed 就好八卦咁聽人哋講嘢，仲講番俾佢哋知 D 日本人講緊咩﹗成班人嘻嘻哈哈睇人哋跳樓、睇夜景，其中見到有個肥佬叉開隻腳同個後生女談情，因為個肥佬背住我哋睇唔到佢個樣，咁我哋成班就狂笑佢好似老頂，仲要作狀影佢相，諗住遲 D 扮唔覺意 Show 俾佢老婆睇，哈哈﹗喺咁短時間大家就咁熟咗喇，果然大家都係後生，容易識朋友﹗
之後出嚟就行去對面既第五屆國際美食展，真係好多嘢食同埋好多餓鬼。個個好似唔駛錢咁係咁逼，其實係要錢食嘢，不過係先買咗美食劵，再好似大富翁咁用劵買嘢，不過大部分係港式酒樓，其中阿 Ken 想買嘢食，但係我一抬頭見到係『聯邦大酒樓』，就叫 Ken 香港都有啦﹗駛咩走嚟食呀﹖大家都笑佢去第二度都係食香港嘢，傻仔嚟既﹗我哋之後食甜品，好好食，叫『冰火蛋糕』同『藍莓 Mousse 蛋糕』，男仔就好似食咗『夫妻肺片』，其實大家都唔知係咩嚟既﹖Ken 試過之後話原來係筍同類似豬腸，但係係勁麻辣，搞到老頂打電話俾佢問佢點集合時，佢都講到好似痴脷筋+發羊吊咁，笑死成班人，咁就一班人玩到 8 點至去食飯喇﹗
我哋去咗一間叫『葡萄園餐廳』食晚飯，原來係金龍酒店直行既位置﹗D 嘢好好食，食咗我好想食既『咖哩炒蟹』，我仲一個人食咗半隻添，食到口都歪埋﹗仲有乳豬飯等等，價錢唔係特別貴，夜晚係貴在老頂叫咗 3 支紅酒，飲到我哋 High High 哋﹗佢又猛喺度講佢點發達，我之後同大 C 講番，原來我哋都係聽咗 3 次﹗但係當然我哋掩飾得好好啦，咪扮晒未聽過咁，猛喺度飲酒囉﹗食到 10:30，去金沙睇嘢見識下﹗唔記得講，老頂下晝去賭場贏咗 $2XXX，食晚埋單，$24XX﹗冇賺兼蝕﹗
去到金沙，一陣煙味﹗臭到嘔﹗因為我哋成班女仔唔識，所以我哋跟實兩個男仔﹗我後尾都有試買一百大細，點知出師不利﹗到到好後期再試買一百，又係大細，好彩贏番打個和﹗之後到冇玩喇，心血少，原來真係好驚架﹗後來走去玩老虎機﹗但係唔識玩，唔知幾時贏，幾時輸，算吧喇﹗我諗我都係贏唔到讀書錢喇﹗到走時兌番錢時竟然贏咗 $20。吓﹗發生咩嘢事呀﹖我都贏到錢﹖問番其他人，原來其他人都輸，Ken 就勁喇，贏咗成千蚊﹗最後問老頂，原來佢輸咗，仲竟然輸咗萬五蚊﹗吓~~~﹗等於我兩個月白做喇﹗好彩之後食嘢佢都有錢找數﹗
返到酒店，我哋後生既就出去食宵夜，不過 Wing 同阿恩就想瞓覺唔去。得番 5 個，可以截到一部的士坐晒，但 5 人的士喺澳門已經得番好少，又要喺寒風之下同人爭，結果等咗好耐，喺決定放棄既時候竟然見到有一部 5 人的喺我哋面前落客，天父多謝祢﹗我哋去咗好出名既六記食宵夜，幾正，食咗豬潤粥暖番下，再試下招牌小食《錦鹵雲吞》（頭先唔慌唔感冒雲吞喇﹗吹風吹到癲）好正﹗好脆﹗仲有炒蜆、撈麵等等，Ken 埋單請客﹗好嘢﹗之後我哋今次好快就截到 5 人的士返酒店沖涼瞓覺喇﹗
返到去 2:30 左右，我第一個沖完洗埋頭出嚟，一路吹頭一路睇下電視做緊咩啦，點知睇到 TVB8 播緊台慶頒獎典禮，咁就搞到唔洗瞓，等埋大 C 一齊睇喇﹗因為係剪輯得獎片段，之後就坐喺度訪問得獎者，其中影完 Bosco 攞獎就影番現場 Bosco 同吳唱 K 坐喺度做訪問，大 C 嘈到拆天（佢係吳唱 K Fan Club Member），我本來就嚟瞓著就咁俾佢嘈醒。跟住極度無聊地阿吳生行咗去前面台唱『別怪他』，兩個主持同 Bosco 睇住佢個 Pat Pat 唔知做咩。咁樣搞法我既睡意又返番嚟﹗於是我同大 C 瞓下又醒下，成 4 點個節目完咗至瞓喇﹗大 C 同大 M 一張床，我自己一張。兩個人瞓都 OK 架﹗
呢篇係有史以來最長既一篇﹗咁又蝕咗一日喇﹗仲有 15 日就考喇~~﹗
文章定位：
