咩野人為因素呀﹖咪就係出票0個個未俾得我囉﹗
尋晚 7:30 搵 Ann 姐問幾時有票，諗住咁遲搵佢可能第一個拎起電話既會係 CP 仔，點知俾我估錯左，第一個拎起電話既係： Annie 。好少見佢咁遲都未走得，之但係我都冇同佢講 D 咩野就搵左 Ann 姐先。
同佢足足講左半個鐘咁濟，主要講番我地既近況呀咁，佢話老細而家做到一頭煙，以前如果我唔0係公司既話會由 Ann 姐幫我分貨既，而家 Ann 姐話廢事啋佢，做掂自己0個樣先喎。同阿 Paul 講既一樣，我仲記得阿 Paul 講過有一日返工，見到老細著住件佢從來唔會就咁著返工既 T-shirt 返黎，頭又唔梳咁樣，我冇見過唔知啦，而家聽埋 Ann 姐咁講，我反而覺得有少少唔開心添。
跟住 Ann 姐都有問我係咪出面有野做緊，我循例答冇，問埋佢點解咁諗。佢就講左同 Rita 一樣既野，但係有少少唔同，就係佢話 CP 仔有問過我喎，咁我梗係講佢冇咁做啦，Ann 姐之後咪話佢正一衰仔黎囉，我諗我地收左線之後 Ann 姐又會叫佢入去傾我既野。
可能佢講正一衰仔時俾人聽到，我突然聽到 Ann 姐好似同其他人講緊野，我挨埋個電話睇下聽唔聽到係邊個啦，原來係男仔聲，我諗唔駛我講你地都知係邊個啦。可能 CP 仔問 Ann 姐同緊邊個講電話，咁 Ann 姐咪話同我講囉。跟住 Ann 姐同番我講，話佢今日唔記得帶卡，咪次次都要麻煩人地開門俾佢囉。仲話頭先佢走去廁所吐痰，吐左十五分鐘至返黎，我心諗：唔知佢係咪已經追到0係隔離單位做野0個個女仔呢﹖又抑或唔知佢係咪同女朋友講電話呢﹖因為未搬0個陣，史力奇曾經見過十樓隔離單位做野0個個女仔（好長呀個名，叫阿水啦﹗），史力奇仲話阿水對住佢笑（禮貌式）呀，幾靚女呀咁囉。咁 CP 仔咪即刻精神為之一振，仲話要即刻仆落去添。唔知佢而家係咪追到人呢﹖個心當堂實一實。不過大家放心，唔好以為咁樣我就會縮沙，我一定會講出黎，因為我唔會俾我自己後悔既﹗
因為今日有 Show 做，應該0係會展度搞，就係之前 CP 仔叫我去參加咩 Image Girl 小姐選舉0個個 Show。所以變左星期三至有得拎票，仲話而家個個都唔出得去食飯，老細嚴格規定 Lunch Hour 個個都要留0係度聽電話，但因為我想同佢地食 Lunch（因為不嬲食 Lunch 都係我同 CP 仔坐嘛 *v*），咁所以我竟然話：咁我買上黎 Office 一齊食啦﹗（死嘞﹗講錯野添﹗）（之前又話唔會俾自己後悔，咁快又…唉﹗信唔過﹗信唔過﹗）但係 Ann 姐講唔理佢嘞，一次半次啫，唔怕既，鬧就鬧囉咁。我至冇咁驚，因為我一早已經諗住要著得靚一靚上去見佢…地嘛。拎住幾個飯盒搞到好似師奶送外賣咁，我唔制﹗﹗
就係咁喇，下一篇就係萬劫不復…呀唔係，係萬眾期待既“告白失敗錄”，留意喇，可能我又會唔見人一排架﹗Bye ....
文章定位：
