8 月 23 日電腦展之後，緊接 24 日又要去會展，原來 Microsoft 有個好 Hi-Tech 既 Training Course，而我公司會0係度擺檔三日至 26 號。
本來唔關我事既，係阿婆 (Paul) 同新黎個同事 (Annie) 去。但係 Annie 25 號下晝突然肚痛。直情要返屋企0個隻，咁 Ann 姐就叫我去頂佢個位囉。
一去到其實都冇咩野，仲去到冇幾耐賣左隻 Software，過萬蚊添架。於是，老細決定第二日最後一日全日叫我出去做 Show。咁我張枱點算呀（怕咩0者﹗打十號風球之嘛）。
又要著到好 Pro，又要長時間坐0係0個度唔准周圍走，又驚老細搞亂我張枱。結果悶到癲。不過最後一日既營業額係三日中最好。有成五萬幾蚊。算係有交代啦。
最後要車返 D 貨返公司，Ann 姐幫我地 Call 左架小型貨車黎車我地，但係架車係 Hello Kitty 車﹗﹗而個司機係一個二十幾歲既…男人。我、阿婆、Henry (IT 同事)望住架車都尷尬異常。突然我望到個窗，有一段日文字，意思係：車上有小孩呀。即係話我地﹖﹖
返到去，果然不出所料，十號風球加山泥傾斜信號持續懸掛中。而 Ann 姐因為要代替我分貨，佢自己已經掛起雷暴警告（即係生人勿近）。
真係好攰。電腦都唔得閒開。但係會展 Show 終於完滿結束喇。老細話兩個 Show 都冇諗過有咁好成績。好野﹗希望年尾我有得加人工啦﹗（發夢冇咁早呀﹗）
文章定位：
