天下竟然有d咁既人，不問自取，是為賊也﹗﹗
上星期生日收到同事送我一盒朱古力，因為另一個同事放大假未返，諗住等佢返嚟先再帶返公司同佢哋分享，好啦，佢尋日終於放完大假返工，咁我今朝咪將盒朱古力帶返去囉。晨早流流又唔想食咁甜既嘢，我就將佢雪入雪櫃等下晝先食。
一日無事，忙忙忙到晏晝5點幾，個同事出完街返嚟我先記得有件咁既事，同R講咁晏又就放工，好唔好再攞出嚟，R就話不如聽日再食，咁我就繼續OT啦。7點幾肚餓，入雪櫃攞返我盒菜醫五臟....唔入去攞嘢尤可，一睇自己盒朱古力.....
紙盒竟然俾人撕爛咗一角，連包裝盒面既貼紙都掀開咗，有無攪錯呀﹗我盒禮物仲未開架﹗放入雪櫃一個朝早就被賊偷食，D人有無公德同公民意識架，假如我盒嘢開過，你偷食都話你以為無人知啫，未開既你都可以唔知係邊個既嘢放喺度就開嚟食，你點做人架﹗連做人既最基本條件你都欠奉呀﹗﹗
勁嬲呀﹗
最後，我盒朱古力可憐地被人食咗半盒﹗離晒大譜﹗
芳姐話唔止我會咁既遭遇，Ally放咗樽柚子茶入雪櫃只係沖咗一兩次嚟飲，一個星期後再開雪櫃，佢樽柚子茶只淨返細半樽﹗
呢間都唔知咩公司嚟架，攪錯呀，做呢行入職唔係都有最基本既誠信要求咩，點解連自己人都唔不濟架﹗無文化無教育一樣，嬲爆呀﹗簡直﹗
私人物件嚟架，偷食缺德呀﹗
最好呢d人吓次唔理邊個但求就手偷食偷著B老闆既嘢，咁佢就死梗﹗
文章定位：
