今-á-日 tī Mosburger tsia̍h-àm ê 時, 我猶想--tio̍h 汝 siōng bô 愛 tsia̍h i ê 馬鈴薯簽.
Kóng i ê 馬鈴薯簽 bô 好-tsia̍h, 我直直想 bē-hiáu 到底 tó-uī bái-tsia̍h.
馬鈴薯 kám m̄ 是 tō tsit-ê 味? Kám kóng tse 世間 ū bô͘-kâng ê 馬鈴薯? I ê 味 kap lâng bô 相像?
Nā MacDonald in 做 ê 馬鈴薯簽 ū khah 油, m̄ 知-iáⁿ 汝 kám 是愛 he 死-tsìⁿ ê mi̍h? Án-ne, kóng 透底汝 bô͘-tiāⁿ 本底 tio̍h bô 愛 tsia̍h 馬鈴薯, 汝愛—ê kan-ta tsìⁿ 馬鈴薯 ê hit-kho͘ 油.
比起馬鈴薯簽, 我 koh khah 愛 kui-粒 ê 馬鈴薯, ū-lâng bat kap 我 tsìⁿ kóng kui-粒馬鈴薯 beh 好-tsia̍h, tō ài lām tshì-suh. 我 kóng 我 khah kah-ì 原味, bô tshì-suh kâng-khuán 好-tsia̍h.
M̄-koh, hit-ê lâng suah kap 我 tsìⁿ 透底, bē-su 我 teh pe̍h-tsha̍t leh.
是 án-tsuáⁿ lán 愛原本 ê lâng, 顛倒是怪-kha. Nā tsiah 愛加油加 tshì-suh, a tō kui-khì kā 油 kā tshì-suh 直接吞吞 lo̍h—khì, bô khah kín?
Van Gogh ê 名畫: Tsia̍h 馬鈴薯 ê lâng, 畫—ê tō 是 tsi̍t-kuá sàn-tshiah-lâng ta̍k-kang tsia̍h-àm ê 身影. 光線 tsiâⁿ 黯, lóng bô 表情, m̄-koh, tse tsiah 是現實 ê 人生, bô 虛華, 免 koh 加味, 內面 ū 真深 ê 智慧.
Kan-ta 油是 bē tsè-ko͘—ê, kan-ta tshì-suh he 是另外一味.
馬鈴薯 ê 甜味 tī i hō͘ lâng 飽-tīⁿ, 鬆軟 ê 厚實, kán-ná bô guā-tsē 酸甜, m̄-koh, 當汝 tsia̍h 了 ê 時, thiám tsi̍t-kang, mā kui-ê lâng 鬆.
文章定位：
