Ｎａｔａｌｉｅ 請給我一點溫暖~!

82愛的鼓勵 0訂閱站台

又好耐冇寫個日記啦～呢個星期好開心呀！

我終於同紹強係埋左一齊，好多人都會奇怪點可以咁快就決定。其他人都唔係好明白，但我地其實可以話已經了解得幾多。由我地第一日見面到而家岩岩好三個月，我冇記錯既話第一日見應該係五月三十一號，之後一次見面就係七月一號。七月二號開始，我地就係ＭＳＮ日日傾計，咩都傾，咩都講～只要我有上網我地就會傾，一傾就幾個鐘，連續傾左一個月有多！慢慢就開始左習慣上網見到佢既日子，亦開始發覺自己返屋企做既第一件事就係開電腦。就算佢唔係屋企，我都會成日望住ＭＳＮ等佢。原來我地就係咁一點一滴每日累積落黎！紹強係一個好細心、體貼既男仔，或者佢係我一直想要既類型．每次同佢出街佢都會送我返屋企，佢話馬鞍山係佢返屋企既必經之路，但佢係住黃大仙，佢咁講我真係好開心。佢會提示我每一個細節，即使我識既唔識既佢都會好周到咁幫我顧慮埋，我可以好放心咁同佢一齊。甚至我明明可以做到既，我都想依賴佢，令我好窩心．．．佢唔係太叻講野，但佢都會用盡佢既辦法哄我開心，哄我笑。只要我開心，佢做咩都冇所謂！佢同我有同一個終點，唔知係咪會令我地更容易一齊衝刺呢？我暫時唔敢肯定，但我明白佢有個堅定既心去做呢件事～

上個星期日去左澳門玩，朝早八點幾就出門啦～約左紹強去黃大仙食早餐，之後一齊出去尖沙咀搭船。玩左一日，佢去左賭場玩，佢係一個幾鐘意賭既人。我冇阻住佢，只係係旁邊睇住佢玩，因為我知道佢係一個有節制既人。睇住佢玩，我都覺得心跳加速，可能我唔習慣掛～嘻．．．之後去左食野，蝦子麵，豆腐花，串燒，仲有去萄京食自助山，都真係幾多野食～果日好熱好曬，就算唔係去左多地方，但都好累！船票係買左十一點架，我地提前想九點半走，但因為果日岩岩有撞船，所以少左班船，最後都係搞到成十點半先上船，等左一個鐘～超累～返到屋企已經一點啦～又要紹強送我，我都知佢好累，但佢都係堅持要送！或者就係鐘意佢咁啦～^^

星期一，真係累都死咁濟，所以放左工，邊到都冇去，返左屋企食飯。

星期二，又約左紹強去街～去左荷里活睇戲，睇’特務Ｓ麥’超好笑～紹強仲帶我去食我鐘意食既上海野，好好食～佢就係咁細心，知道我鐘意食咩佢就會帶我去食。佢亦都係一樣小心，知道我鐘意食呢樣就去食，唔知道我鐘唔鐘意就唔會亂帶我去食，每次都係我話事～

星期三，我細佬農曆生日去左食飯，佢又左佢個女朋友一齊去～都ｏｋ既，唔理佢地啦～

星期四，去左街，陪紹強去拎電腦，跟住去食飯～同佢一齊走下街，感覺好舒服。佢同我講佢唔係搵女朋友，係搵老婆，我好開心，佢有咁既心意。我有少少質疑佢點解咁快可以肯定我，但佢話我遲早會明白。佢係一個好癡身既男朋友，成日都要見住，其實我真係好鐘意咁樣～我鐘意受人關心，受人重視既感覺，無論我去左邊，係咪同佢出街都好，我都可以切切實實咁係佢每一句話入面感受到。

星期五，同ＪＯＹＣＥ做完ＧＹＭ之後，去搵紹強，佢去左ＲＹＡＮ屋企打麻雀，我就同ＪＯＹＣＥ一齊係屋企玩，煮野食，打機，試衫，睇碟．．．佢地打十二圈，等到成二點半先打完～我累到死咁濟，佢又送我～早知唔等佢一齊走啦，佢第二日仲要返工架嘛～結果佢成三點半先返到屋企！

星期六，本身諗住整芝士煙肉批比佢食既～不過由於前一晚太夜訓既關係，所以我走唔到身，冇整到。調轉左佢整雞翼炒公仔麵比我食，好好味，我覺得自己好幸福，因為有個人會整野比我食。夜晚去左元朗食飯，去見俊俊，佢大個仔左好多～而家講野都好叻，教佢咩都識，超可愛。但好似都係一樣脾氣唔好～唔知點解一見到我細佬就係咁喊，喊唔停．．．不過佢玩走上黎都幾好玩既～小朋友就係咁鐘意無啦啦發脾氣！

今日，係屋企訓到十二點半，走身梳洗，去飲茶因為爸爸休息。飲完茶返黎見冇咩搞就開始試下整個批～整左成二個幾鐘，都算ＯＫ既，不過仲要改良下。爸爸媽媽食左都話幾好食～好開心，佢地終於肯試啦！

只從同紹強一齊，我又好似比以前更忙～但咁都幾好呀，生活變得充實。