春天ｅ霧 講台語、寫台文，是飄撇台灣人天生自然的本領。 　

505愛的鼓勵 3訂閱站台

　世間事無奇不有。毋過，天腳下閣較譀（ham3）古的代誌，對千百年來直直遭受外人蹧踢的台灣人來講，一點仔攏袂感覺怪奇。

　前幾日，佇中國廣州亞洲運動會跆拳道比賽的會場，咱國優秀選手楊淑君無代無誌予支那人佮高麗人連手創掉的垃圾手段，佇歷史上毋是頭一擺，嘛絕對袂是最後一擺。楊淑君的目屎是台灣人的目屎，楊淑君的委屈嘛是所有台灣人的委屈。毋過，成作台灣人無需要閣再悲傷佮流目屎，因為按呢干單會予遐看咱無、共咱蹧踢耍--e的毋成人，繼續對咱無情的打壓。

　所有毋甘、憤怒的台灣人，咱愛合齊拱相偎，繼續發出咱毋甘願受屈辱的聲音，予全世界的正義人士知影，台灣人無愛閣成作恬恬毋敢出聲的新婦仔。古早人講「拍斷手骨顛倒勇」，的確有影，經過這擺的人生考驗，相信咱台灣的勇敢女性楊淑君，未來定著會行出閣較堅定的腳步。

 

──2010.11.20《自由時報》「自由廣場」