春天ｅ霧 講台語、寫台文，是飄撇台灣人天生自然的本領。 　

505愛的鼓勵 3訂閱站台

　　今暗（2010.7.20），熱人無界漚歙的暗暝。參耀乾兄去台南華納威秀電影院看電影「被出賣的台灣」試映會。這齣電影是由美國籍台灣人刁毓能所製作的，是一齣融合美麗島事件、陳文成事件佮江南事件改編的白色恐怖電影。規齣電影自頭到尾攏無冷場，會使講是具備標準好萊塢技術面的電影，無論規個情節的鋪排、電影鏡頭的運用抑是剪接攏有水準以上的表現。其中，較可惜的欠點，除了濟濟電影場景是佇泰國所拍的以外，就是內中演員所講的台語佮華語較袂輪轉。內面的主角是一位美國FBI的探員，為著欲調查佇美國的台灣人教授被殺害的證據，飛來台灣實際調查拄著一寡伊原底料想袂到的代誌，到遮伊才知影彼陣的台灣根本毋是一個自由、民主的所在。當該然，這齣電影上界大的意義，是伊將台灣白色恐怖時期的現實面表現出來，儘管伊有淡薄仔無鬥搭的所在；總是，並無損害規齣電影的價值。向望8月初6起，全台灣的鄉親阿母招阿爸、阿姊招阿兄、厝邊招隔壁，手牽手作陣去各地的戲園觀看這齣對台灣人有特殊意義的好電影「被出賣的台灣」。

－－2010.7.23《自由時報》「自由廣場」